Ցխինվալիում Վրաստանի ևս երկու քաղաքացի է ապօրինի ազատազրկման դատապարտվել

Վրաստանի պետանվտանգության ծառայության վերլուծական դեպարտամենտի փոխտնօրեն Իրակլի Անթաձեի խոսքով՝ օկուպացիոն ռեժիմը Գելա Յոբաշվիլիին ձերբակալել է սեպտեմբերի 14-ին, սակայն այս մասին Պետանվտանգության ծառայությունը տեղեկացել է միայն երեկ՝ սեպտեմբերի 22-ին։ Անթաձեի խոսքով, այսպես կոչված դատարանը Յոբաշվիլիին դատապարտել է երկամսյա նախնական կալանքի։

Ինչ վերաբերում է Նուկրի Կալաշնիկովին, ապա Անթաձեն միայն ասել է, որ Ցխինվալիի դե ֆակտո դատարանը Նուկրի Կալաշնիկովի հանդեպ որպես խափանման միջոց ընտրել է երկամսյա կալանքը, և որ նա նախկինում նույնպես կալանավորվել է օկուպացիոն ռեժիմի կողմից։

Էրգնեթիում այսօր տեղի է ունենում հերթական հանդիպումը ռուսական օկուպացիոն ուժերի ներկայացուցիչների հետ, որի օրակարգային հիմնական հարցերից մեկը ապօրինի բանտարկյալների ազատ արձակումն է։

Բացի Գելա Յոբաշվիլիից և Նուկրի Կալաշնիկովից, Ցխինվալիի բանտում անօրինական կալանքի տակ են գտնվում Մամուկա Չխիկվաձեն, Կախաբեր Նաթաձեն և Լաշա Խեթերելին։

Նախկին զինծառայող Մամուկա Չխիկվաձեն ձերբակալվել է 2021 թվականի դեկտեմբերին Գորիի մունիցիպալիտետի Նիքոզի գյուղի մոտ։ Այսպես կոչված սահմանն ապօրինի հատելուն զուգահեռ՝ նա մեղադրվում է թմրանյութերի տեղափոխման մեջ։ 2022 թվականի մայիսին դե ֆակտո դատարանը Չխիկվաձեին դատապարտել է 5,6 տարվա ազատազրկման, որը բողոքարկվել է նրա տեղի փաստաբանի կողմից և անօրինական պատիժը կրճատվել է մինչև 3,8 տարի։

24-ամյա Լաշա Խեթերելին տեղահանված է Լիախվիի հովտից և հարազատներ ունի օկուպացված տարածքում։ Օկուպացիոն ռեժիմի ներկայացուցիչները նրան վեցերորդ անգամ ձերբակալել են 2021 թվականի դեկտեմբերին։ Վերջին անգամ (հինգերորդ անգամ) նա ձերբակալվել է 2020 թվականի հունիսի 30-ին և մեկ տարվա ապօրինի պատիժ կրել Ցխինվալիի բանտում։

1977 թվականին ծնված Կախաբեր Նաթաձեն նույնպես Հարավային Օսիայի դե ֆակտո անվտանգության կոմիտեի կողմից մեղադրվում է սահմանն ապօրինի հատելու մեջ։ Նա ձերբակալվել է 2021 թվականի դեկտեմբերի 10-ին օկուպացված Ծինգարի գյուղի մոտ։ Կախաբեր Նաթաձեն Գորիի բնակիչ է։