Ռուսաստանին Ուկրաինայում հավանաբար օգնում են Իրանի հեղափոխության պահապանների կորպուսի հրահանգիչները

«Պատերազմի ուսումնասիրման ինստիտուտը» (ISW) արձագանքել է Ուկրաինայի Ազգային դիմադրության կենտրոնի տեղեկությանը, ըստ որի Ղրիմում և Խերսոնում գտնվում են իրանցի հրահանգիչներ։ Ըստ դիմադրության կենտրոնի, նրանք ռուսներին սովորեցնում են օգտագործել իրանական արտադրության անօդաչու թռչող սարքեր՝ «Շահիդ 136» և ուղղակիորեն վերահսկում են «կամիկաձե անօդաչու թռչող սարքերի» արձակումը ուկրաինական քաղաքացիական օբյեկտների վրա, այդ թվում՝ հարվածները Միկոլաևի և Օդեսայի վրա։

«Իրանական անօդաչու թռչող սարքերի հիմնական օպերատորը Իրանի Իսլամական հեղափոխության պահապանների կորպուսն է»։ Ըստ այդմ, իրանցի հրահանգիչները, ամենայն հավանականությամբ, կարող են լինել նրա ներկայացուցիչները կամ նրա հետ առնչվող անձինք»,- ասվում է Պատերազմի ուսումնասիրման ինստիտուտի զեկույցում։

Ռուսաստանը ակտիվորեն օգտագործում է «Շահիդ 136»-ը Ուկրաինայի դեմ պատերազմում: «Ինչպես տեսնում ենք, Իրանը ագրեսորին օգնում է ոչ միայն տեխնիկայով, այլ նաև մարդկանցով»,- նշում է Ուկրաինայի Ազգային դիմադրության կենտրոնը։

Ուկրաինայի Զինված ուժերի ռազմաօդային ուժերի հրամանատարության տվյալներով՝ միայն հոկտեմբերի 12-ին օրվա ընթացքում՝ 17 «Շահիդ» է խփվել։ Երեկ երեկոյան չորս այսպես կոչված կամիկաձե է վնասազերծվել Օդեսայի շրջանում, իսկ երկուսը՝ Միկոլաևում: Ռուսաստանը թևավոր հրթիռների հետ միասին իրանական «Շահիդներ» է օգտագործել հոկտեմբերի 10-ին՝ Կիևի և այլ քաղաքների վրա զանգվածային հրթիռային հարձակումների ժամանակ։