ԱՄՆ-ը պատժամիջոցներ է սահմանել Ռամզան Կադիրովի, նրա կանանց ու երեխաների նկատմամբ

Ֆինանսների նախարարության կայքում հրապարակված տեղեկատվության համաձայն՝ Կադիրովը դաժան գլխավոր հրամանատար է, որը կապ ունի խոշտանգումների և սպանությունների դեպքերի հետ և մոբիլիզացնում է չեչեններին Ուկրաինայում կռվելու համար.

«Կադիրովը, ով իրեն հրապարակայնորեն բնութագրում է որպես Պուտինի «հետևակային զինվոր», ստացել է գեներալ-լեյտենանտի կոչում Ուկրաինայում Ռուսաստանի ներխուժման գործում ունեցած դերի համար։ Կադիրովի հետ կապված չեչենական ստորաբաժանումները գործել են Բուչայում, որտեղ ռուսական զորքերը սարսափելի հանցագործություններ են կատարել։ Կադիրովը մարդկանց է հավաքագրում է Ռուսաստանի կողմից պատերազմին մասնակցելու համար՝ թույլ տալով իր ստորաբաժանումներին շարունակել գործունեությունը Ուկրաինայում: Կադիրովը մեծ հարստություն է կուտակել Վլադիմիր Պուտինի հետ սերտ հարաբերությունների շնորհիվ։ Սա ներառում է տուն Արաբական Միացյալ Էմիրություններում, մասնավոր կենդանաբանական այգի և շքեղ մեքենաներ»:

Գործակալության տվյալներով՝ Կադիրովն ունի ֆինանսական պահուստ, որն օգտագործվում է անօրինական նպատակներով։

ԱՄՆ-ը պատժամիջոցներ է կիրառել Կադիրովի դուստրերի՝ Այշատի, Կարինայի և Թաբարիկի, նրա կնոջ՝ Մեդնիի, ինչպես նաև Ֆաթիմա Խազուևայի և Ամինաթ Ախմադովայի նկատմամբ, որոնք նույնպես համարվում են Կադիրովի կանայք։ Firdaws-ը՝ Չեչնիայի առաջին «ազգային նորաձևության բրենդը» նույնպես ենթարկվել է պատժամիջոցների։ Նշված ընկերության սեփականատերը Այշատ Կադիրովան էր, ով ներկայումս զբաղեցնում է Չեչնիայի մշակույթի նախարարի առաջին տեղակալի պաշտոնը։ ԱՄՆ գանձապետարանը նշում է, որ ընկերությունը դեռևս վերահսկվում է Կադիրովի դստեր կողմից։

«Շատ ծիծաղելի է, քանի որ ես երբեք կապ չեմ ունենա Ամերիկայի հետ, չեմ ճանապարհորդելու այնտեղ, այնտեղ հաշիվներ չունեմ։ Ես դրսում ոչինչ չունեմ, այնտեղ միայն ընկերներ ունեմ։ ԱՄՆ-ում լավ գիտեն, որ ես ոչ ակտիվներ ունեմ, ոչ էլ հաշիվներ Արևմուտքում, բայց համառորեն ինձ ներառում են պատժամիջոցների ցուցակում, և այս անգամ, չգիտես ինչու, ներառել են իմ ընտանիքի անդամներին, այդ թվում՝ աղջկաս, ով վերջերս է դարձել չափահաս: Ես չգիտեմ, թե որ օրենքն է խախտել։ Ինչո՞ւ եք ձգձգում Ամերիկացիներ, պատժամիջոցներ կիրառեք իմ բոլոր 14 երեխաների նկատմամբ՝ ամենափոքրը՝ երկվորյակներ Հասանն ու Հուսեյնը, հինգ տարեկան են»,- պատասխանել է Կադիրովը ԱՄՆ ֆինանսների նախարարության որոշմանը։

Սա առաջին դեպքը չէ, երբ Կադիրովը և նրա ընտանիքի անդամները ենթարկվում են ԱՄՆ-ի պատժամիջոցների։ 2020 թվականին Պետդեպարտամենտը Չեչնիայի ղեկավարին, նրա կնոջն ու երկու երեխաներին պատժամիջոցների ցուցակում է ներառել մարդու իրավունքների կոպիտ խախտումներին նրանց մասնակցության համար։ 2017 թվականից Կադիրովը, ԱՄՆ ֆինանսների նախարարության այսպես կոչված «Մագնիտսկու» ցուցակում է, որը նախատեսում է տնտեսական և վիզային պատժամիջոցներ կոռուպցիայի և մարդու իրավունքների խախտման հետ կապված անձանց նկատմամբ:

Կադիրովի նկատմամբ պատժամիջոցներ են կիրառել նաև Ավստրալիան, Կանադան, Եվրամիությունը, Ճապոնիան, Շվեյցարիան և Մեծ Բրիտանիան։