Բռնաբարության փորձի մեղադրանքով ձերբակալվել է «Մթավարի» ալիքի հաղորդավարը

Հեռուստահաղորդավարի ձերբակալությանը «Մթավարի» ալիքը արձագանքել է հայտարարությամբ: Հեռուստաալիքի տվյալներով՝ «Մթավարի» ալիքի աշխատակիցներից մեկը ոստիկանությանը հայտնել է 2022 թվականի օգոստոսի 15-ին տեղի ունեցած դեպքի մասին, որից հետո տուժած կինը բժշկական զննում է անցել, հարցաքննվել, իսկ Լաշա Նակաիձեն նրա ցուցմունքի հիման վրա ձերբակալվել է։

Ելնելով Նակաիձեին առաջադրված մեղադրանքի լրջությունից՝ «Մթավարի» ալիքն իրեն պարտավոր է համարում դադարեցնել նրա հետ ցանկացած տեսակի համագործակցություն, սակայն եթե նրա հանցանքը չհաստատվի, հեռուստաալիքը կվերանայի գործնական հարաբերությունները վերականգնելու հնարավորությունը Լաշա Նակաիձեի հետ։

Հեռուստաընկերությունը դատապարտում և զերծ է մնում ցանկացած տեսակի բռնությունից, հատկապես, երբ խոսքը վերաբերում է տղամարդու կողմից կնոջ նկատմամբ բռնությանը, որը ոչ մի դեպքում արդարացված չէ։

Լաշա Նակաիձեն ձերբակալվել է օգոստոսի 16-ին։

Ներքին գործերի նախարարության վիճակագրական տվյալների համաձայն՝ 2022 թվականի հունվարից հունիս ամիսներին ընտանեկան բռնության դեպքերի համար կիրառվել է 4 313 խափանման միջոց։ Արձանագրված դեպքերից 1094-ը՝ ֆիզիկական բռնություն, 3988-ը՝ հոգեբանական, 86-ը՝ տնտեսական, 39-ը՝ հարկադրանք, 20-ը՝ անտեսում։ Մեկ գրանցված դեպքում կարող է լինել միաժամանակ երկու կամ երեք տարբեր տեսակի բռնություն։

2021 թվականին երկրում գրանցվել է ընտանեկան բռնության 9376 դեպք։