Դե ֆակտո Աբխազիային մերժել են նախագահական ընտրությունների համար Թուրքիայում ընտրատեղամաս բացել

Թուրքիայում նախատեսվում էր «ընտրական տեղամաս» բացել Սաքարյա քաղաքում։

«Որոշումն ընդունվել է Թուրքիայում Հանրապետության լիազոր ներկայացուցիչ Իբրահիմ Ավիզբայի գրության հիման վրա՝ ընտրատեղամասի բացման անհնարինության վերաբերյալ։ Տեղամասային հանձնաժողովը կլուծարվի»,- հայտնել են այսպես կոչված Կենտրոնական ընտրական հանձնաժողովից։

Աբխազական AMPA-life Telegram ալիքը գրում է, որ թուրքական իշխանություններն արգելել են «աբխազական սփյուռքին» անցկացնել քվեարկություն, այդ թվում՝ Վրաստանի ճնշման պատճառով, որի ԱԳՆ-ը վերջերս համապատասխան նոտա է ուղարկել այդ հարցով։

AMPA-life-ի փոխանցմամբ՝ «Թուրքիայում Աբխազիայի ներկայացուցչին զգուշացրել են ընտրատեղամասերի բացման արգելքը խախտելու դեպքում ներկայացուցչության հնարավոր փակման մասին»։

Այսպես կոչված արտահերթ նախագահական ընտրություններին հինգ թեկնածու է մասնակցում.

• Բադրա Գունբա – դե ֆակտո նախագահի պաշտոնակատար,
• Ադգուր Արձինբա – «Աբխազիայի ժողովրդական շարժման» առաջնորդ, էկոնոմիկայի նախկին նախարար,
• Օլեգ Բարցից – Աբխազիայի նախկին առևտրային ներկայացուցիչ Մոսկվայում,
• Ռոբերտ Արշբա – Վերահսկիչ պալատի նախկին ղեկավար,
• Ադգուր Խուրումալի – Սևծովյան զարգացման բանկի տնօրենների խորհրդի նախագահ։

Դե ֆակտո Աբխազիայի Կենտրոնական ընտրական հանձնաժողովի տվյալներով՝ Աբխազիայի տարածքում կբացվի 152 ընտրատեղամաս։ Ընդհանուր ցուցակում գրանցված ընտրողների թիվը մոտավորապես 135 հազար է։

Վրաստանի կառավարությունն ու միջազգային հանրությունը չեն ճանաչում օկուպացված տարածքներում անցկացված այսպես կոչված ընտրությունները։