Քութայիսիում բանկի վրա հարձակվելու մեջ մեղադրվողին սպառնում է մինչև 12 տարվա ազատազրկում

236-րդ հոդվածը վերաբերում է հրազենի, ռազմամթերքի, պայթուցիկ նյութերի կամ պայթուցիկ սարքերի ապօրինի պատրաստելուն, փոխադրելուն կամ իրացնելուն և պատժվում է ազատազրկմամբ՝ վեցից ինը տարի ժամկետով։

323-րդ հոդվածը վերաբերում է ահաբեկչական գործողություն կատարելու սպառնալիքներին և պատժվում է ազատազրկմամբ՝ վեցից տասներկու տարի ժամկետով։

329-րդ հոդվածը վերաբերում է ահաբեկչական նպատակներով պատանդ վերցնելուն և պատժվում է ազատազրկմամբ՝ ութից տասներկու տարի ժամկետով։

Գրիգոլ Նարսիան ձերբակալվել է շուրջ ինը ժամ տևած հատուկ գործողության արդյունքում, իսկ 14 պատանդները ազատ են արձակվել։ Միջադեպի արդյունքում ոչ ոք չի տուժել։

Տղամարդը բանկ է ներխուժել ժամը 11:00-ի սահմաններում: Բանկի աշխատակիցներին ու պատանդ վերցված հաճախորդներին ազատ արձակելու դիմաց նա պահանջել է 2 մլն ԱՄՆ դոլար և ուղղաթիռ։ Հարձակվողը պարբերաբար հեռարձակում էր իր պահանջներն ու սպառնալիքները պատանդների կողմից նկարահանված տեսանյութերի միջոցով։ Ի սկզբանե նա ոստիկանությանը երեք ժամ ժամանակ է տվել պայմանները կատարելու համար։ Այս ժամկետը լրացել է ժամը 15:00-ի սահմաններում։ Պատանդները պնդում էին, որ հարձակվողը բանկում պայթուցիկ սարքեր է տեղադրել և սպառնում էր պայթեցնել:

Բանկի վրա հարձակումից մոտ վեց ժամ անց Քութայիսի է ժամանել ներքին գործերի նախարար Վախտանգ Գոմելաուրին։ Հատուկ գործողության ավարտից հետո նա առանց մեկնաբանության լքել է բանկի շրջակայքը։

Բանկերի վրա զինված հարձակման ամենաաղմկահարույց դեպքը տեղի է ունեցել երկու տարի առաջ: 2020 թվականի հոկտեմբերի 21-ին նախկին զինծառայող, 32-ամյա Բադրի Էսեբուան ներխուժել է Զուգդիդիում գտնվող «Վրաստանի բանկի» մասնաճյուղ և պատանդ վերցրել 43 մարդու։ Էսեբուան պահանջել է 500 000 դոլար և անվտանգ անցում։ Պահանջները կատարելուց հետո նա երեք պատանդների ու Սամեգրելո-Զեմո Սվանեթիի ոստիկանության բաժնի տնօրեն Ավթանդիլ Գալդավայի հետ լքել է բանկի շենքը։ Նրանք ուշ գիշերով մեքենայով հեռացել են Զուգդիդիից, որից հետո Էսեբուան թաքնվել է։ Նախկին պատանդ Լաշա Շենգելիան ասել է, որ իրենց ազատ են արձակել մթության մեջ՝ անհայտ վայրում։ Ոստիկանությունը մինչ այժմ չի ձերբակալել Բադրի Էսեբուային։ Ներքին գործերի նախարարությունը հետաքննություն է վարում Քրեական օրենսգրքի 323, 329 և 236 հոդվածներով, որոնք վերաբերում են ահաբեկչությանը, ահաբեկչական նպատակներով պատանդ վերցնելուն և ապօրինի կերպով հրազեն ձեռք բերելուն, պահելուն և կրելուն։

«Ոչ ոք ինձնից շատ չի ցանկանում, որ բռնենք Բադրի Էսեբուային։ Անցել է մեկուկես տարի։ Նա ոչ ոքի չի սպանել և չի վիրավորել, թեև կատարել է ամենածանր հանցագործությունը, մենք ամեն ինչ անում ենք, ամեն կերպ օպերատիվ աշխատում ենք այս մարդուն բռնելու համար»,- 2022 թվականի մարտին ասել է ՆԳ նախարար Վախթանգ Գոմելաուրին։

Ընդդիմությունը Էսեբուայի գործի պատճառով պահանջում էր ներքին գործերի նախարար Վախթանգ Գոմելաուրիի հրաժարականը։

• 2020 թվականի հոկտեմբերի 22-ին Քոբուլեթիում թալանել են «Վրաստանի բանկի» գանձապահին։
• Նույն թվականի նոյեմբերի 20-ին 31-ամյա Լևան Զուրաբաշվիլին խաղալիք ատրճանակով ներխուժել է Թբիլիսիի «Micro Business Capital» միկրոֆինանսական կազմակերպություն և ներկայացրել 3 պահանջ՝ արգելել մոլախաղերը, բանկերը պետք է բոլոր տեսակի վարկերի տարեկան տոկոսադրույքը իջեցնեն մինչև 7%, նվազեցնել դեղերի գները և արգելել դեղագործական ընկերություններին տարեկան 10%-ից ավելի շահույթ ստանալ: Բանկում գտնվող 19 հոգին վստահ են եղել, որ Զուրաբաշվիլին իր մոտ նաև նռնակ ունեցել։ Դատարանը նրան դատապարտել է 7 տարվա ազատազրկման։
• Նոյեմբերի 27-ին զինված անձը թալանել է Թբիլիսիի Դիղոմի թաղամասում գտնվող «Վրաստանի բանկի» էքսպրես մասնաճյուղը:
• 2021 թվականի սեպտեմբերի 11-ին 49-ամյա Շալվա Մելիքիշվիլին ներխուժել է «Վրաստանի բանկի» Կվարելիի մասնաճյուղ և պատանդ վերցրել 6 մարդու։ Հարձակվողը պահանջել է 500 000 լարի և 500 000 ԱՄՆ դոլար պատանդներին ազատ արձակելու դիմաց և շենքից անվտանգ հեռանալու միջոցներ, հակառակ դեպքում սպառնացել է պայթեցնել ձեռքի նռնակը և սպանել պատանդներին։ Ոստիկանները ձերբակալել են հարձակվողին, իսկ պատանդներն ազատ են արձակվել։
• 2021 թվականի ապրիլին «Վրաստանի բանկի» մասնաճյուղերը երկու անգամ թալանվել են Թբիլիսիում՝ Սամգորում և Աֆրիկայում։
• 2022 թվականի հունիսի 10-ին հարձակում է տեղի ունեցել «Վրաստանի բանկի» Բաթումիի մասնաճյուղի վրա։