Մամուկա Խազարաձեն հանդես է գալիս «Ժողովրդական խորհրդարան» ստեղծելու նախաձեռնությամբ

«Նոր ընտրությունների հասնելու համար անհրաժեշտ է.

1. Տարբեր ձևերով մշտական ​​փողոցային բողոքի ցույցերի շարունակություն՝ աշխարհագրորեն տարբեր վայրերում, Թբիլիսիում և ողջ Վրաստանում։
2. Խորհրդարանի ապալեգիտիմացում, որն արտահայտվում է ընտրված ընդդիմադիր պատգամավորների՝ մանդատները անհատապես վայր դնելու մասին դիմումներով։ Նաև 4 ընդդիմադիր կուսակցությունների կողմից ընտրացուցակների չեղարկումով։
3. Ընդդիմությունից ընտրված խորհրդարանի անդամների կողմից «Ժողովրդական խորհրդարանի» ձևավորում, նախագահ Զուրաբիշվիլիին որպես «Ժողովրդական խորհրդարանի» պատվավոր նախագահի նշանակում, իրական, ազգային քաղաքական կենտրոնի ստեղծում։
4. «Ժողովրդական խորհրդարանի» գործողությունների ծրագրի մշակում։
5. «Ժողովրդական խորհրդարանի» պատվիրակության գործուղում մեր արևմտյան ընկերների մոտ և նրանց աջակցության ուժեղացում»,- գրել է Մամուկա Խազարաձեն Facebook-ում։

Նոյեմբերի 17-ին՝ ժամը 20:00-ին, Թբիլիսիի Ճավճավաձեի պողոտայում սկսվել է շուրջօրյա շարունակական բողոքի ակցիա, որը կազմակերպել են ընդդիմադիր «Միասնություն-Ազգային շարժում» և «Կոալիցիա հանուն փոփոխությունների» կուսակցությունները։ Բողոքի ակցիային միացել են նաև «Գախարիան հանուն Վրաստանի» և «Ուժեղ Վրաստանի» անդամները, որոնք պահանջում են  նոր խորհրդարանական ընտրություններ։

Մեկ օր առաջ Վրաստանի Կենտրոնական ընտրական հանձնաժողովի նախագահ Գիորգի Կալանդարիշվիլին ստորագրել է ընտրությունների ամփոփիչ արձանագրությունը։ ԿԸՀ վերջնական արդյունքների համաձայն՝ խորհրդարանական ընտրություններում «Վրացական երազանքը» ստացել է ձայների 53,93 տոկոսը և օրենսդիր մարմնում 150 մանդատներից՝ 89-ը, «Հանուն փոփոխությունների կոալիցիան» ունի ձայների 11,03 տոկոսը և 19 մանդատ, «Միասնություն-Ազգային շարժումը»՝ 10.17% և 16 մանդատ, «Ուժեղ Վրաստանը»՝ 8,81% և 14 մանդատ, իսկ «Գախարիան հանուն Վրաստանի» կուսակցությունը՝ 7,78% և 12 մանդատ։