Ըստ Ուկրաինայի նախագահի գրասենյակի ղեկավարի խորհրդական Օլեքսի Արեստովիչի՝ Ռուսաստանի մեծ թվով քաղաքացիների մուտքը Վրաստան աղետալի է, հատկապես հաշվի առնելով, որ Վրաստանն ունի «ռուսամետ կառավարություն, որը չունի որոշումներ կայացնելու ունակություն»:
«Ոչնչացրեցին այն ամենը, ինչ ստեղծեց Սաակաշվիլին՝ նորից կոռումպացվեց ոստիկանությունը, վրացիներն իրենք են ասում, որ ամեն ինչ վաճառվում է և այլն։ Սա, իհարկե, հսկայական խնդիր է ազգային անվտանգության համար։ Պատկերացնում եմ, թե ինչպես են Վրաստանում մազերը պոկում հայրենասերները՝ հատուկ ծառայություններում և կառավարությունում։ Ինչպես լուծել սա, շատ մեծ խնդիր է»,- այս մեկնաբանությունն է արել Արեստովիչը հոկտեմբերի 2-ին՝ YouTube-ի ալիքներից մեկում տեղի ունեցած քննարկման ժամանակ։
Մինչ այդ, քննարկման մյուս մասնակիցները նշել են, որ Ռուսաստանը պատրաստվում է Վրաստանին բռնակցել, իսկ ռուս փախստականները նման սցենարի ֆոն են ստեղծում։ Արեստովիչն ասել է, որ ուկրաինացի զինվորականները կփրկեն Վրաստանը.
«Մենք այնտեղ ուժ ենք ցուցադրելու։ Մենք ստիպված կլինենք փրկել վրացիներին, փրկել Մոլդովան, փրկել Հայաստանը և այլն, փրկել բոլորին: Սա լավ նորություն է, քանի որ մոտ ապագայում մեր միլիոնավոր տղաներն ու աղջիկները հետխորհրդային տարածքում միշտ անելիք կունենան, բառացիորեն՝ խաղաղապահներ, կայունացման գործողություններ, հումանիտար գործողություններ և այլն։ Անհրաժեշտ կլինի ամեն ինչ կարգի բերել»։
Քննարկման ժամանակ Օլեքսի Արեստովիչը նշել է, որ Ուկրաինան ունի աշխարհի ամենամարտունակ բանակներից մեկը և մշտական պահանջարկ ունեցող ռեսուրս կլինի, հատկապես, եթե Ռուսաստանը սկսի քայքայվել. «Ես միշտ ասել եմ և դեռ ասում եմ՝ եկեք, եկեք ուժ ցուցադրենք, որովհետև զինվորներին հետևում են դիվանագետները, դիվանագետներին՝ կապիտալը։ Սա մեր խաղն է: Մենք ենք գրում կանոնները»:
Արեստովիչին քննադատել են Վրաստանի կառավարության և «Վրացական երազանքի» ներկայացուցիչները։ Արդարադատության նախարար Ռատի Բրեգաձեն ասել է, որ նա հանցավոր բնույթի հայտարարություն է արել և խորհուրդ է տվել ծանոթանալ միջազգային իրավունքին։ «Վրացական երազանքի» պատգամավոր Իրակլի Քադագիշվիլին Օլեքսի Արեստովիչի հայտարարությունը գնահատել է որպես սպառնալիք. «Մենք ընդունում ենք նոր իմպերիալիստներին, երբ առաջինը հայտնվեց ռուսական սապոգը, դրան հաջորդեց դիվանագիտությունը, կառավարումը, ապա ռուսական վերակառուցումը։ Հիմա Արեստովիչ-ուկրաինական պլանը սա է: Ես չեմ խոսում ամբողջ Ուկրաինայի մասին։ Վրացիներ, լավ իմանանք, թե ինչ է «Սլավա Ուկրաինան» կռվողների համար և ինչ է Արեստովիչի համար։ Այստեղ շատ կտրուկ տարբերություն կա»,- ասել է Քադագիշվիլին։
Վրաստանի փոխվարչապետ, մշակույթի, սպորտի և երիտասարդության նախարար Թեա Ծուլուկիանին նշել է, որ ավելի լավ կլինի «Ուկրաինայի բարձրաստիճան պաշտոնյաները, ովքեր ներկայումս զբաղված են վրաց ազգին իմաստություն հաղորդելով, նայեն ուկրաինացի ժողովրդին»:
