Լրահոս

Օգոստոսի 23-ին կայացած ճեպազրույցում ընդդիմադիր կուսակցության նախագահն ասել է, որ ոստիկանները Վրաստանում զարգացման հեռանկար չեն տեսնում և «լքում են երկիրը, քանի որ չեն ցանկանում աշխատել ռուս օլիգարխի անձնական անվտանգության համար»:

«Հազարավոր ոստիկաններ լքում են այս երկիրը կամ ակտիվորեն մտածում են հեռանալու մասին։ Նկատի ունեմ ներքին գործերի նախարարության համակարգում աշխատող հայրենասեր ոստիկաններին: Միայն օգոստոսին ՆԳՆ-ի հայտարարած թափուր աշխատատեղերը հաստատում են, որ ուժային կառույցներից կադրերի արտահոսքը զանգվածային է։ Նախարարությունը մրցույթ է հայտարարել պարեկային ոստիկանության բաժնում 145 թափուր հաստիքի համար։ Ոստիկանությունում այդքան մեծ թվով թափուր աշխատատեղեր երբեք չեն եղել։

Գործակալությունում հարյուրավոր դիմումներ են գրված՝ ծառայությունից դուրս գալու խնդրանքով, որոնք չեն բավարարվում, բայց շատերն անգամ առանց հարցնելու են փախչում։ Նրանք փախչում են և Մեքսիկայով մուտք գործում Ամերիկա, ապա նոր այտեղից տեղյակ պահում, որ գերատեսչությունից հեռացել են։

Փախչում են, որովհետև այս իշխանությունը հայրենասեր մարդկանց երկրում մնալու հնարավորություն չի թողնում։ Անհեռանկարության ու անհուսության հետ մեկտեղ, նրանցից այնքան անօրինական հրամաններ են պահանջում կատարել, որ այս անգործ երկրում նրանք ինքնուրույն են լքում իրենց աշխատանքը»,- ասել է Նիկա Մելիան և իր խոսքում անդրադարձել է նաև ոստիկանների աշխատավարձին. «Ոստիկանի աշխատավարձը չի գերազանցում 1600 լարին, մինչդեռ նրանց նախարար, Իվանիշվիլիի անձնական թիկնապահ Գոմելաուրին հպարտանում է իր շքեղ տներով ու ամառանոցներով, ընտանիքի անդամի համար մի քանի հարյուր հազար լարիի արժողության հարսանիք է կազմակերպում, որտեղ միայն մեկ տորթի համար վճարում է 5000 լարի։ Ռուսական երազանքի իշխանությունը փոխելուց հետո նոր իշխանությունն ամեն ինչ անելու է, որ ոստիկանությունը պայքարի հանցագործների, ոչ թե իշխանության հակառակորդների դեմ»։

Պարեկային ոստիկանության բաժանմունքում 145 թափուր պաշտոն զբաղեցնելու նպատակով ՆԳՆ-ն օգոստոսի 17-ին մրցույթ է հայտարարել։ Նախարարության կայքում հրապարակված տեղեկության համաձայն՝ մրցույթն անցկացվում է պարեկային տեսուչի՝ 47, սահմանապահի՝ 38, և սահմանապահի պարտավորություններ կատարողի(աշխատանքային պայմանագրով աշխատող)՝ 60, պաշտոնների համար։

Ներքին գործերի նախարար Վախտանգ Գոմելաուրիի խոսքով՝ գերատեսչությունում «մարդիկ գնում ու գալիս են»։

«Ես չգիտեմ, թե ով է լքում երկիրը։ Ոմանք գնում են, ոմանք՝ գալիս: Եթե ​​4000 մարդ գնաց [գերատեսչությունից], քանի՞սն են եկել, չե՞ք հարցրել։

Ինչքան շատ աշխատավարձ ունենան իմ ոստիկանները, և ոչ միայն ոստիկանները, բոլորը, ինչպես նաև ես երջանիկ կլինեմ։ Ինչ վերաբերում է հոսքին՝ երբ 4000 հոգի դուրս է եկել, նույն քանակությամբ մուտք է գործել։ Հիմա 140 կամ 145 հոգու թափուր աշխատատեղ ենք հայտարարել։ Աղմուկ է բարձրացել՝ վայ, ինչ է կատարվում, երկիրը կործանվեց... այս պահին մենք 38000 հոգի ենք։ Պատկերացրեք՝ 145 հոգու համար ենք հայտարարել թափուր աշխատատեղեր։ Այստեղից, եթե չեմ սխալվում, մոտ 60-ը կամ 58-ը սահմանային ոստիկանության համար էր, որի դեպքում եթե չեմ սխալվում պարտադիր է անգլերենի իմացությունը։ Թեկնածուները շատ էին, թեև լեզվի իմացությունը բավարար չէր, որպեսզի կարողանային զբոսաշրջիկին դիմավորել և այլն։ Մենք 140 հոգու թափուր աշխատատեղ ենք հայտարարել ու այդ մասին լուր տարածվեց։ Այս ամենին կապեցին հետո, որ 4000 հոգի գնացել է: 4000 գնացել է, հնարավոր է 5000-ը եկել է։ Այս թեման միշտ կա: Մարդիկ գնում ու գալիս են»,- ասել Վախտանգ Գոմելաուրին։