Ընտրակեղծիքների գործով Ռովշան Իսկանդարովի նկատմամբ դատարանը նախնական կալանք է կիրառվել

Իսկանդարովներն առաջադրված մեղադրանքում իրենց մեղավոր չեն ճանաչում։ Դատավարության ընթացքում սակրեբուլոյի փոխնախագահը կրկին խոսել է ընդդիմության սադրանքի մասին։

«Որ ասում են կեղծիք, ինձ կեղծիք պետք չէ։ Բոլորը գիտեն, Սադախլոյի բնակիչները, ովքեր ապրում են Սադախլոյի վարչական միավորում, 100 տոկոսով իմ կողքին են։ [...] «Ազգային շարժման» դիտորդներն առավոտից միջամտում էին, տարեցներին թույլ չէին տալիս քվեարկել։ Ամեն ինչ դրա պատճառով եղավ։ Ամեն ինչ ծրագրված էր։ Ես դրանում վստահ եմ Աստծո և ձեր առջև: Հուսով եմ՝ սա «Ազգային շարժման» դատարանը չէ, արդար դատարան է։ Վերևում մենք վստահում ենք Աստծուն, իսկ ներքևում՝ ձեզ»,- ասել է Ռովշան Իսկանդարովը։

Փաստաբան Զուրաբ Դալաքիշվիլին Իսկանդարովների կողմից քրեական հանցագործությունը բացառում է։ Ըստ նրա՝ «կարող էր լինել ինչ-որ ընթացակարգային խախտումներ»։

«Կեղծ քվեաթերթիկներ գոյություն չունեն։ Ուստի ընտրակեղծիքների մասին խոսել հնարավոր չէ։ Կադրերից եզրակացություններ արեցինք, հանրությունը տեղեկություն չունի այդ պահին ընտրատեղամասում տիրող իրավիճակի մասին։ Ապացույցներ չկան այսօր և չեն լինի ապագայում։ Թե ինչ է եղել իրականում, պատասխան կտրվի քննությունից հետո»,- լրագրողներին ասել է փաստաբանը։

Գործի դատախազը նշել է, որ քվեաթերթիկների լցոնումը ցուցադրող տեսանյութը հիմնավորվում է հարցաքննության արձանագրություններով և վկաների ցուցմունքներով, որոնք հաստատում են, որ երկու ամբաստանյալներն էլ քվեաթերթիկները լցրել են քվեատուփի մեջ։

Ռովշան Իսկանդարովը «Վրացական երազանքի» անդամ է և սակրեբուլոյում Սադախլոյի մեծամասնական պատգամավորը։

Հոկտեմբերի 26-ին՝ խորհրդարանական ընտրությունների օրը, սոցիալական ցանցերում տարածվել է 69-րդ տեղամասում դիտորդի կողմից նկարահանված տեսանյութ, որտեղ երևում է, թե ինչպես է Ռովշան Իսկանդարովը քվեաթերթիկներ լցնում արկղի մեջ։ Տեսանյութում երևում է նաև մեկ այլ տղամարդ, ով օգնում է նրան այդ գործում։

Ռովշան Իսկանդարովին ու նրա զարմիկին ոստիկանությունը ձերբակալել է հոկտեմբերի 31-ին։ Ըստ դատախազության՝ իրականացված քննությամբ պարզվել է, որ քվեարկության օրը ամբաստանյալները կեղծ քվեաթերթիկներ են լցրել քվեատուփի մեջ՝ ընտրությունները կեղծելու նպատակով, ինչը հանգեցրել է նշված տեղամասում քվեարկության դադարեցման և քվեարկության արդյունքները անվավեր ճանաչելուն։ Նրանց մեղադրանք է առաջադրվել Վրաստանի քրեական օրենսգրքի 1643-րդ հոդվածով (ընտրակեղծիք), որը նախատեսում է մինչև 2 տարվա ազատազրկում։