Ընտրությունների արդյունքների ամփոփման նպատակով այսօր ԿԸՀ-ում տեղի կունենա նիստ

Նիստին զուգահեռ նախատեսվում է բողոքի ցույց անցկացնել ընտրական վարչության շենքի մոտ։

«Վաղը ԿԸՀ-ն կամփոփի վերջնական արձանագրությունը։ Վաղը նաև ֆուտբոլային հանդիպում կա, և նրանք հույս ունեն թաքցնել դա այսպես։ ԿԸՀ-ի դիմաց հավաքվելու, պայքարի տեղ կա, ժամը 11-ին։ Նրանք իսկապես գողեր են»,- սոցցանցում գրել է «Միասնություն-Ազգային շարժում» կուսակցության առաջնորդներից Խատիա Դեկանոիձեն։

Հանրահավաք են նախաձեռնել նաև ուսանողներն ու հասարակական տարբեր շարժումները։

Վրաստանի Կենտրոնական ընտրական հանձնաժողովի նախնական տվյալներով՝ խորհրդարանական ընտրություններում «Վրացական երազանքի» օգտին քվեարկել է ընտրողների 53,93%-ը (1 120 011 ընտրող)։ Այս արդյունքի լեգիտիմությունը չեն ճանաչում ընտրական շեմը հաղթահարած ընդդիմադիր կուսակցությունները, որոնց միջև ձայները բաշխվել են հետևյալ կերպ.

• «Կոալիցիա հանուն փոփոխությունների» - (11.037%)
• «Միասնություն-Ազգային շարժում» - (10․164%)
• «Ուժեղ Վրաստան» - (8․814%)
• «Գախարիան հանուն Վրաստանի» - (7․771%)

Նախագահ Սալոմե Զուրաբիշվիլին նույնպես կարծում է, որ ընտրությունները «ամբողջովին կեղծվել են»։ Նրա խոսքով՝ Վրաստանը դարձել է «ռուսական հատուկ գործողությունների զոհ»։

Սահմանադրության համաձայն՝ նորընտիր խորհրդարանի առաջին նիստն անցկացվում է խորհրդարանական ընտրությունների արդյունքների պաշտոնական հրապարակման օրվանից ոչ ուշ, քան տասներորդ օրը։