«Պետք է ավելին անել»․ սենատոր Ռիշը՝ Իվանիշվիլիի պատժամիջոցների և Կավելաշվիլիի նախագահության մասին

«Չնայած ընդդիմության բոյկոտին, Վրաստանի խորհրդարանը նախագահ է նշանակել բացահայտ հակաարևմտյան քաղաքական գործչի։ Վրաստանի ընկերներին մերժելու կառավարության փորձը հայտնի է, բայց մենք չենք մերժի ժողովրդին»,- գրել է սենատորը X հարթակում։

Ըստ Ջիմ Ռիշի, թեև ԱՄՆ-ը վերջապես ուշացած պատժամիջոցներ է սահմանել «Վրացական երազանքի» պատվավոր նախագահ Բիձինա Իվանիշվիլիի դեմ՝ Վրաստանում շարունակվող քաղաքական ցնցումների մեջ նրա դերի համար, «պետք է ավելին անել»:

«Կրկնում եմ, որ ԱՄՆ-ը չի հրաժարվի վրաց ժողովրդից և ազատ, արդար ժողովրդավարություն ունենալու նրա ցանկությունից»,- ասել է Ռիշը։

Դեկտեմբերի 29-ին Վրաստանի խորհրդարանում տեղի է ունեցել Միխեիլ Կավելաշվիլիի երդմնակալությունը, ով նախագահ է ընտրվել «Վրացական երազանքի» ընտրական կոլեգիայի կողմից։ Արարողությանը հրավիրված չեն եղել օտարերկրյա դիվանագետներ։

Հանրապետական ​​կոնգրեսական, Հելսինկյան հանձնաժողովի նախագահ Ջո Ուիլսոնը նույնպես արձագանքել է երդմնակալությանը՝ հայտարարելով, որ.

«Ամերիկան ​​աջակցում է Վրաստանի միակ օրինական առաջնորդ Սալոմե Զուրաբիշվիլիին և վրաց ժողովրդի ազատ ու արդար ընտրությունների պահանջին»։

«Ինքնիշխանությունը չի վաճառվում, և ազատ ժողովրդի կամքը կհաղթի»,- գրել է Ուիլսոնը։ Մինչ այդ նա Սալոմե Զուրաբիշվիլիին հրավիրել է Դոնալդ Թրամփի երդմնակալության արարողությանը, որը տեղի կունենա հունվարի 20-ին։

Ընդդիմադիր կուսակցությունները և Վրաստանի հինգերորդ նախագահ Սալոմե Զուրաբիշվիլին, ինչպես նաև եվրոպամետ ակցիաների տասնյակ հազարավոր մասնակիցները, Միխեիլ Կավելաշվիլիին չեն համարում լեգիտիմ նախագահ։ Մինչ այժմ Կավելաշվիլիին նախագահության կապակցությամբ շնորհավորել են Թուրքիայի նախագահ Ռեջեփ Թայիփ Էրդողանը, Ադրբեջանի նախագահ Իլհամ Ալիևը, Բելառուսի նախագահ Ալեքսանդր Լուկաշենկոն, Սերբիայի նախագահ Ալեքսանդր Վուչիչը և Հայաստանի վարչապետ Նիկոլ Փաշինյանը։