Պուտինը Ռուսաստանում մասնակի մոբիլիզացիա է հայտարարել

«Մեր հայրենիքը, նրա ինքնիշխանությունն ու տարածքային ամբողջականությունը պաշտպանելու, մեր ժողովրդի և ազատագրված տարածքներում ապրող մարդկանց անվտանգությունն ապահովելու համար անհրաժեշտ եմ համարում սատարել ՊՆ և ԳՇ առաջարկին՝ Ռուսաստանի Դաշնությունում մասնակի մոբիլիզացիա հայտարարելու մասին»,- ասել է Պուտինը այսօր առավոտյան հրապարակված տեսաուղերձում։

ՌԴ նախագահի խոսքով՝ մասնակի մոբիլիզացիայի շրջանակներում զինվորական զորակոչի կենթարկվեն միայն այն քաղաքացիները, որոնք պահեստազորում են, և առաջին հերթին՝ նրանք, ովքեր ծառայել են զինված ուժերի շարքերում և ունեն փորձ։ «Մինչ ստորաբաժանումներ ուղարկելը նրանք, անշուշտ, լրացուցիչ ռազմական պատրաստություն կանցնեն՝ հաշվի առնելով հատուկ ռազմական գործողության փորձը»։

Տասնչորս րոպե տևող տեսաուղերձում Պուտինը նշել է, որ Վաշինգտոնը, Լոնդոնը և Բրյուսելը Կիևին դրդրում են ռազմական գործողությունները տեղափոխել Ռուսաստանի տարածք՝ ոչնչացնելու համար Ռուսաստանը, ինչը կհանգեցնի նրա ինքնիշխանության կորստին: «Նրանք, ովքեր փորձում են մեզ շանտաժի ենթարկել միջուկային զենքով, պետք է իմանան, որ իրավիճակը կարող է փոխվել։ Երբ մեր երկրի տարածքային ամբողջականությանը վտանգ է սպառնում, մենք, անշուշտ, կօգտագործենք մեր ձեռքի տակ եղած բոլոր միջոցները Ռուսաստանին և մեր ժողովրդին պաշտպանելու համար։ Սա բլեֆ չէ»,- ասել է Պուտինը։

«Վեսնա» շարժման ակտիվիստները կոչ են արել Ռուսաստանի քաղաքացիներին սեպտեմբերի 21-ին, ժամը 19:00-ին հավաքվել քաղաքների կենտրոնական փողոցներում և բողոքի ակցիաներ անցկացնել Պուտինի կողմից հայտարարված մասնակի մոբիլիզացիայի դեմ.

«Հազարավոր ռուս տղամարդիկ՝ մեր հայրերը, եղբայրներն ու ամուսինները, կնետվեն պատերազմի մսաղացը։ Ինչի՞ համար պետք է նրանք մեռնեն։ Ինչո՞ւ պետք է մայրերն ու երեխաները արցունքներ թափեն: Պուտինի պալատի համա՞ր: Այսուհետ պատերազմն իսկապես գալու է բոլորի տուն»,- նշված է շարժման հայտարարության մեջ։

Ռուսաստանի նախագահը Ուկրաինայի օկուպացված տարածքների վերաբերյալ իր տեսաուղերձում արձագանքել է նաև այսպես կոչված հանրաքվեների անցկացմանը և ասել, որ «Ռուսաստանն ամեն ինչ անելու է, որպեսզի ժողովուրդն արտահայտի իր կամքը։ Մենք կաջակցենք Դոնեցկի և Լուգանսկի Ժողովրդական Հանրապետությունների, Զապորոժիեի և Խերսոնի շրջանների բնակիչների մեծամասնության որոշմանը՝ իրենց ապագայի վերաբերյալ»։

Ինքնահռչակ Լուգանսկի և Դոնեցկի Ժողովրդական Հանրապետություններում, ինչպես նաև Խերսոնի և Զապորոժիայի շրջաններում սեպտեմբերի 23-27-ը նախատեսվում է անցկացնել Ռուսաստանին միանալու հանրաքվե։ Այսպես կոչված հանրաքվեների օրինականությունը ո՛չ Ուկրաինան, ո՛չ միջազգային հանրությունը չեն ճանաչում: Ուկրաինայի արտաքին գործերի նախարար Դմիտրի Կուլեբան հայտարարել է, որ Ռուսաստանը եղել և մնում է ագրեսոր, որն անօրինական կերպով զավթում է ուկրաինական հողերը։