Պուտինի օգնական. 30-օրյա զինադադարը ոչ այլ ինչ է, քան դադար ուկրաինացիների համար

«Մենք կարծում ենք, որ մեր նպատակը երկարաժամկետ խաղաղ կարգավորումն է, և մենք կաշխատենք դրա ուղղությամբ։ Խաղաղ կարգավորում, որը հաշվի կառնի մեր երկրի օրինական շահերը, մեր հայտնի մտահոգությունները։ Կարծում եմ, որ այս իրավիճակում ոչ մեկին պետք չեն խաղաղ գործողությունների իմիտացիա»,- ասել է Ուշակովը։

Ինչպես նշել է Ուշակովը, նա ուրվագծել է Ռուսաստանի դիրքորոշումը ԱՄՆ նախագահի ազգային անվտանգության հարցերով խորհրդական Մայք Ուոլցի հետ հեռախոսազրույցի ժամանակ։

«Բնականաբար, ես մեկնաբանեցի ժամանակավոր զինադադարի մասին ձեռք բերված պայմանավորվածությունը և հայտնեցի մեր դիրքորոշումը, որ սա ոչ այլ ինչ է, քան ժամանակավոր դադար ուկրաինացի զինվորականների համար։ Ուրիշ ոչինչ»,- ասել է Յուրի Ուշակովը։

30-օրյա զինադադարի մասին առաջարկը ԱՄՆ-ն արել է մարտի 11-ին Սաուդյան Արաբիայում Ուկրաինայի հետ բանակցությունների ժամանակ։ Ուկրաինան սատարել է առաջարկը։

Ինչպես ասել է Ուկրաինայի նախագահ Վլադիմիր Զելենսկին, ԱՄՆ-ի առաջարկը վերաբերում է ամբողջական հրադադարին՝ «ոչ միայն հրթիռների, անօդաչու թռչող սարքերի և ռումբերի մասով, ոչ միայն Սև ծովում, այլև ողջ ճակատային գծում»։

«Ուկրաինան ընդունում է այս առաջարկը, մենք այն դրական ենք համարում, պատրաստ ենք գնալ նման քայլի։ Միացյալ Նահանգները պետք է համոզի Ռուսաստանին, որ մենք համաձայն ենք, և եթե «ռուսները» համաձայնեն, ապա «լռությունը» կգործի», - Ջիդդա քաղաքում բանակցող թիմերի հանդիպումից հետո ասել է Զելենսկին։

ՌԴ նախագահ Վլադիմիր Պուտինը դեռ չի մեկնաբանել 30-օրյա հրադադարի առաջարկը։