Թուրքիայում հավանաբար կանցկացվի նախագահական ընտրությունների երկրորդ փուլ

Քվեատուփերի 99,31%-ը հաշվելուց հետո Էրդողանը ստացել է ձայների 49,41%-ը, իսկ նրա հիմնական մրցակիցը՝ ընդդիմության ներկայացրած թեկնածու Քեմալ Քըլըչդարօղլուն՝ 44,96%-ը։

Վաղ առավոտյան Անկարայում աջակիցների հետ անցկացրած հանդիպման ժամանակ իր ելույթում Էրդողանն ասել է, որ Թուրքիան և նրա ժողովուրդը հաղթել են ընտրություններում՝ անկախ դրանց արդյունքներից։

«Մայիսի 14-ը մեր երկրի ընտրությունների պատմության մեջ ընտրողների մասնակցության առումով ռեկորդներից մեկն էր։ Մեր քաղաքական գործունեության ընթացքում մենք հարգանք ենք դրսևորել ժողովրդի կամքի նկատմամբ։ Մենք հարգում ենք ընտրողների կարծիքը այս և հետագա բոլոր ընտրություններում։ Մեր օգտին ձայների տարբերությունը մոտ 2,6 միլիոն է, ուստի մենք դեռ հավատում ենք առաջին փուլում հաղթանակին, բայց եթե ժողովուրդը ընտրություն է կատարել երկրորդ փուլի օգտին, մենք պատրաստ ենք այս որոշումը կայացնել»,- ասել է Էրդողանը։

«Եթե մարդիկ ասեն, որ կլինի երկրորդ փուլ, մենք կհաղթենք երկրորդ փուլը: Հասարակության մեջ փոփոխությունների ցանկությունը 50%-ից ավելի է»,- լրագրողներին ասել է Քեմալ Քըլըչդարօղլուն։

Թուրքիայի խորհրդարանական ընտրությունները նույնպես կայացել են մայիսի 14-ին։ Ըստ նախնական արդյունքների՝ առաջատարը Էրդողանի «Արդարություն և զարգացում» կուսակցությունն է։ Երկրորդ տեղում է «Թուրքիայի ժողովրդահանրապետական ​​կուսակցությունը», որի նախագահն է Քեմալ Քըլըչդարօղլուն։

Ռեջեփ Թայիփ Էրդողանը երկիրը ղեկավարել է երկու տասնամյակ։ 2003-2014 թվականներին եղել է վարչապետ, իսկ 2014 թվականից՝ նախագահ։

Թուրքիայում նախագահական ընտրություններն անցկացվում են 5 տարին մեկ։ Նախագահի թեկնածու առաջադրելու իրավունք ունի նախորդ խորհրդարանական ընտրություններում 5 տոկոսի շեմը հաղթահարած կուսակցությունը կամ 100 հազար ընտրող։ Նախագահ է դառնում այն ​​թեկնածուն, որը ստանում է ձայների 50%-ից ավելին առաջին փուլում, իսկ եթե ոչ մի թեկնածու չի հավաքում ձայների մեծամասնությունը՝անցկացվում է երկրորդ փուլ լավագույն արդյունքներ գրանցած երկու թեկնածուների միջև։ Այս տարի երկրորդ փուլը սպասվում է մայիսի 28-ին։

Խորհրդարանական ընտրություններն անցկացվում են նախագահական ընտրությունների հետ միասին։ Ընտրողները 600 հոգանոց բարձրագույն օրենսդիր մարմնում իրենց ներկայացուցիչներին ընտրում են համամասնական ընտրակարգով։