«Վրացական երազանքը» դադարել է երազանք լինելուց, այն դարձել է մղձավանջ. նախագահ

Ըստ Զուրաբիշվիլիի, Վրաստանը միշտ իրեն եվրոպական երկիր է պատկերացրել և հայացքն ուղղել է դեպի Արևմուտք, քանի որ ցանկանում էր անկախ լինել կայսրություններից, հատկապես մեր հյուսիսային հարևանից:

«Այն, ինչ այսօր կատարվում է, ողբերգություն է Վրաստանի համար։ Ողբերգություն է, երբ ոմանք, չեմ ասում՝ մենք, բայց ոմանք մեր երկարամյա հիմնական գործընկերներին պատերազմի կուսակցություն են անվանում ու ոչինչ չեն ասում մեր տարածքի 20%-ը գրաված հարևան երկրի մասին։ Ողբերգություն է, երբ սկսում ես խառնաշփոթ անել և չգիտես, թե որտեղ է քո հիմնական ուշադրությունը: Դա ողբերգություն է մարդու, անհատի համար, և դա ավելի մեծ ողբերգություն է երկրի համար: Հատկապես այնպիսի երկրի համար, ինչպիսին Վրաստանն է, որը դարեր շարունակ միշտ գիտի, թե ինչպես պաշտպանել իր անկախությունը, իր արժեքներն ու մշակույթը»,- ասել է նախագահը։

Ըստ Սալոմե Զուրաբիշվիլիի, «Վրացական երազանքի» պատվավոր նախագահ Բիձինա Իվանիշվիլին գործնականում պատերազմ է հայտարարում երկրի գործընկերներին, ինչպես նաև սեփական բնակչությանը, երկրի քաղաքական ուժերին։

«Նախապես ասում են, որ ստանալու են սահմանադրական մեծամասնությունը, որն իրենց երազանքն է, և կարգելեն քաղաքական կուսակցություններին, կամ էլ նրանց կանցկացնեն արդարադատության համակարգով, որն արդեն գոյություն չունի։ Մենք երեկ և նախօրեին տեսանք, թե ինչպես է Սահմանադրական դատարանը հիմա փորձում արդարացնել, հակառակ ամբողջ իրականության, որ ռուսական օրենքն իրականում չի խլում Վրաստանի եվրոպական ապագան, որ այն չի ազդում մեր հիմնական կողմնորոշման վրա։ Այնպես որ այս ամենն անընդունելի է։ Սա առաջին հերթին անընդունելի է վրաց ժողովրդի համար։ Դուրս գալով փողոց՝ վրաց ժողովուրդն արդեն երկու անգամ ասել է՝ անցյալ և այս տարի շատ հստակ, որ համաձայն չէ այն ամենի հետ, ինչ կատարվում է այս երկրում։ Նրանք չեն ընդունում Վրաստանի այս նոր կերպարը, և որ պատրաստ չեն ենթարկվել այս նոր ավտորիտար ռեժիմին ու իշխանությանը»,- ասել է Զուրաբիշվիլին։ Նախագահը նշել է, որ հավատում է, որ Վրաստանի բնակչությունն իր խոսքը կասի ընտրություններում։

Սեպտեմբերի 2-ին մեկնարկել է Թբիլիսիի 8-րդ միջազգային համաժողովը՝ «Բեկումնային տարի»։ Միջոցառմանը մասնակցում են Վրաստանի ընդդիմության անդամներ, օտարերկրյա քաղաքական գործիչներ, դիվանագետներ, հետազոտողներ և քաղաքացիական կազմակերպությունների ներկայացուցիչներ։ Նրանց թվում են Վրաստանում ԱՄՆ նախկին դեսպան Յան Քելլին, Ջորջ Բուշի ինստիտուտի գործադիր տնօրեն Դեյվիդ Կրամերը, եվրոպացի պատգամավորներ Ռասա Յուկնևիչիանեն և Մարկետա Գրեգորովան։