Խորհրդարանի մոտ արցունքաբեր գազ է արձակվել, քաղաքացիների ուղղությամբ կրակել են ռետինե փամփուշտներ

Չիտաձեի փողոցում՝ խորհրդարանի բակի դարպասի մոտ, լարված իրավիճակ է եղել։ Հենց այնտեղ հավաքված ցուցարարների ուղղությամբ է կիրառվել ջրցան մեքենա և պղպեղի սփրեյ։

Հանրահավաքի մասնակիցներն ասում են, որ գազի պատճառով դժվարանում են շնչել, բայց չեն պատրաստվում ցրվել։

ՆԳՆ-ն հայտարարություն է տարածել, ըստ որի՝ այն բանից հետո, երբ գերատեսչության ստորաբաժանումները լքել են խորհրդարանի հարակից տարածքը, հանրահավաքի մասնակիցները ագրեսիվ են դարձել և փորձել են վնասել օրենսդիր մարմնի մուտքի երկաթե դռները։

«Օրենքն ու կարգը վերականգնելու նպատակով ՆԳՆ աշխատակիցները կիրառել են օրենքով սահմանված հատուկ միջոց՝ այսպես կոչված պղպեղի սփրեյ և ջրցան մեքենա: Հանրահավաքի յուրաքանչյուր մասնակցի կոչ ենք անում հանգիստ արտահայտել իրենց բողոքը, թույլ չտալ բռնի գործողություններ և ենթարկվել իրավապահների օրինական հրահանգներին։ Ոստիկանությունը ցանկացած օրինախախտ արարքի դեպքում իրավական արձագանք կտա»,- հայտնում են ՆԳՆ-ից։

Մայիսի 1-ին խորհրդարանը երկրորդ ընթերցմամբ ընդունել է ռուսական օրենքը՝ ձայների 83 կողմ, 23 դեմ հարաբերակցությամբ։ «Վրացական երազանքի» պատգամավորները օրենսդիր մարմնից հեռացել են ոստիկանական շղթայի օգնությամբ։