Gürcüstanın Dövlət Təhlükəsizlik Xidməti güman ki, “Gürcü Arzusu”nun fəxri sədri Bidzina İvanişviliyə və partiyanın digər yüksək rütbəli məmurlarına qarşı terror aktının hazırlanması ilə bağlı istintaq aparır. Qela Kaxabrişvili və onun vəkili Mixeil Ramişvili bu gün Tbilisi Şəhər Məhkəməsində sorğunu başa vurduqdan sonra DTX müstəntiqinin suallarının, məhz bununla bağlı olduğunu bildiriblər. Abxaziya və 2008-ci ilin avqust müharibələrinin veteranı Qela Kaxabrişvili Ukraynada döyüşən azsaylı gürcülərdən biridir və bu yaxınlarda DTX tərəfindən dindirilməyə çağırılıb.
Əsas xəbərlər
“Kontuziya almışam, sağalmağa gəlmişəm və məni terror aktında və başqa şeylərdə ittiham edirlər”, - Qela Kaxabrişvili bildirib. O, jurnalistlərə açıqlamasında ittihamları axmaq və absurd adlandırıb. Kaxabrişvilinin sözlərinə görə, hökumətin məqsədi döyüşçüləri qorxutmaqdır.
“Söhbət “Gürcü Arzusu”nun fəxri sədri Bidzina İvanişvili ilə bağlı gedirdi. Söhbət ondan gedirdi ki, guya Gürcüstanda belə bir şey, terror aktı hazırlanır, bununla da hökumət çevrilişi olmalıdır. Məlumat, bəyanat ola bilər ki, hüquq-mühafizə orqanları buna uyğun reaksiya versin. Belə bir bəyanatla bağlı obyektiv istintaq aparılmalıdır. Lakin bundan seçkilər öncəsi, fərqli fikir və çıxışlara görə müəyyən siyasi məhdudiyyətlər üçün istifadə edilməməlidir”, - deyə vəkil Mixeil Ramişvili bildirib.
Dövlət Təhlükəsizliyi Xidməti aparılan istintaqla bağlı açıqlama verməyib. Bununla belə, bu yaxınlarda hökumətyönlü mediada Gürcüstanın konstitusiya strukturunun zorakılıq yolu ilə dəyişdirilməsi və terror aktının hazırlanması ilə bağlı sui-qəsddən ibarət 315 və 18-323-cü maddələrlə cinayət işi başlanıldığı bildirilir. Orada bildirildiyinə görə, iş “məxfidir” və vəkillər gizli saxlama müqaviləsi imzalayıblar.
Məhkəmədə magistrat hakiminin iştirakı ilə Ukraynada döyüşmüş Nadim Xmaladze və Laşa Çiqladze də dindirilib, lakin onlar verilən sualların İvanişviliyə qarşı terror aktının hazırlanması ilə bağlı olduğunu deməyiblər.
Çiqladzenin dediyi kimi, DTX-da davam edən istintaq “tamamilə absurddur və Gürcüstan uğrunda döyüşmüş hər bir döyüşçü üçün təhqirdir”.
“Bizi axmaq maddələrlə - terror aktları, dövlət çevrilişi ilə dindirilməyə çağırırlar. Oradan [Ukraynadan] gələn oğlanların törətdiyi bir cinayət göstərsinlər.Yoxdur və olmayacaq da. Bir ildir ölkədəyəm, müalicə almırdı, iki dəfə kontuziya almışam. Hansı terror aktı? Nə çevriliş? Bizə ruslar belə deyirlər ki, biz terrorçu, gürcü döyüşçüləriyik”, - Çiqladze bildirib.
DTX dindirilməyə Vaja Tsetsadze və Konstantin Jqamaianı da çağırıb. Onlar da Ukraynada döyüşürlər.
Dövlət Təhlükəsizlik Xidməti son illərdə dəfələrlə hökuməti devirmək planları barədə bəyanat yayıb. Mayın 8-də “xarici agentlər” rus qanununa qarşı çoxminlik etiraz aksiyası fonunda DTX “1990-cı illərin vətəndaş qarşıdurmasına bənzər hadisələrin törədilməsi” təhlükəsinin olduğunu bildirib. “Ölkədən kənarda Gürcüstan vətəndaşları, xüsusən də Ukraynada döyüşən gürcülərin konkret bir hissəsi cinayət planlarında fəal iştirak edirlər”, - o zaman Dövlət Təhlükəsizlik Xidməti konkret sübut təqdim etmədən bildirib. Bundan əvvəl, 2023-cü ilin oktyabrında DTX gözlənilən inqilabi ssenarilər və hökuməti devirmək planları barədə bəyanat yayıb. DTX-nın məlumatına görə, oktyabr-dekabr aylarında Gürcüstan ərazisində və ondan kənarda fəaliyyət göstərən bir qrup şəxs Gürcüstanda, yekun məqsədi zorakı yolla hakimiyyəti dəyişmək olan sabitliyin pozulması və vətəndaş iğtişaşları təşkil etməyi planlaşdırıb.
