Gürcüstan hökumətinin nümayəndələri Avropa İttifaqına üzv olmaqda çətinlik çəkə bilər. Finlandiyanın xarici işlər naziri Elina Valtonen bu barədə Lüksemburqda Avropa İttifaqının Xarici Əlaqələr Şurasının iclası başlamazdan əvvəl bildirib.
Əsas xəbərlər
“Biz Gürcüstandakı mövcud vəziyyətə xüsusi diqqət yetirəcəyik. Biz hökumətin Aİ-yə gələcək inteqrasiyadan, qanunun aliliyindən, açıq cəmiyyətdən və demokratiyadan geri çəkilmək qərarından təəssüflənirik.
Mesajımız yüksək səsli və aydındır - biz gürcü xalqını layiq olduğu demokratiya, müstəqillik, qanunun aliliyi və insan hüquqlarına aparan yolda dəstəkləyirik və öz hökumətindən qapını açmağı xahiş edirik.
İndi hakimiyyətin xalqın bu həqiqi iradəsinə qarşı addımlar atdığı bir vaxtda biz hakimiyyətə qarşı tədbirləri düşünməli, eyni zamanda xalqa olan ümidi yaşatmalıyıq. Bu tədbirlər mövcuddur. Məsələn, bizim edə biləcəyimiz iş gürcü rəsmilərinin Avropaya səfərini çətinləşdirməkdir. Bu, sanksiyalar mənasına gələ bilər, həm də bizim görə biləcəyimiz bir sıra tədbirlər mənasına gələ bilər. Biz [Finlandiya] Gürcüstan xalqına deyil, Gürcüstan hökumətinə şamil olan tədbirlərə açığıq”, - Elina Valtonen jurnalistlərə bildirib.
Avropa İttifaqının Xarici İşlər və Təhlükəsizlik Siyasəti üzrə ali nümayəndəsi Cozef Borelin sədrliyi ilə Lüksemburqda Xarici Əlaqələr Şurası keçirilir.
Müzakirə olunacaq məsələlər arasında “xarici agentlər” haqqında rus qanununun yenidən irəli sürülməsi və qəbulundan sonrakı vəziyyət də var. Cozef Borelin dediyi kimi, 27 ölkənin xarici işlər nazirləri Aİ-nin “qısa və ortamüddətli perspektivdə” edə biləcəyi variantları müzakirə edəcəklər.
Borel qeyd edib ki, qısa müddətdə Gürcüstan üçün Avropa Sülh Mexanizminə Dəstəyin dayandırılması, yüksək səviyyəli siyasi təmasların dayandırılması, maliyyə dəstəyinin birbaşa hökumətə gedən hissəsinin dayandırılması nəzərdən keçirilir.
