Gürcüstanı heç kim və heç vaxt keçmişə qaytara bilməyəcək - Zurabişvili

“Gürcüstan Xəbərləri” prezidentin müraciətini olduğu kimi təqdim edir:

“Gürcüstan əsgərləri, mən, Gürcüstanı və onun müstəqilliyini qoruyan ali baş komandanınız, sizə müraciət edirəm! Bu gün and içən və Gürcüstana xidmət etməyə hazır olan sizə müraciət edirəm! Bu qədər əsrlərdən sonra, bu qədər müharibələrdən, işğal cəhdlərindən sonra bu gün azad, qürurlu və sarsılmaz olan xalq qalibdir, yenilməzdir!

Bu, sizin xidmətiniz və bizim ümumi nailiyyətimizdir. Biz, vətən və müstəqilliyi uğrunda canından keçmiş o insanları, o qəhrəmanları, naməlum əsgərləri heç vaxt unutmayacağıq, onlara xəyanət etməyəcəyik. Azad və müstəqil Gürcüstanın qayğısına qalmaq, onu heç kimə güzəştə getməmək bizim daimi borcumuzdur!

Mən bütün Gürcüstana müraciət edirəm, sizə müraciət edirəm və bilirəm ki, ölkəmizin indiki vəziyyəti sizi nə qədər incidir. Ölkənin müstəqilliyi və Avropa gələcəyinin təhlükə altında olduğu bu gün sizin nə hiss etdiyinizi bilirəm. Ümidsizliyə düçar olmayın, bu ölkəni, onun müstəqilliyini siz bu ölkənin vətəndaşları qurub, qoruyub saxlamısınız və bu gün biz onu gücləndirməli, möhkəmləndirməliyik!

Təsadüfi deyil ki, Gürcüstan üçün həlledici bir zamanda ölkə prezidenti 1918-ci il mayın 26-da elan edilmiş Gürcüstanın müstəqilliyi uğrunda mübarizə aparan və onu hazırlayan mühacirətin övladıdır. Təsadüfi deyil ki, bu gün ölkə prezidenti işğalçı rus qoşunlarını sülh yolu ilə çıxaran şəxsdir. Bu ölkənin müstəqilliyi və Avropa gələcəyi üçün hər şeyi etməyi öz ata-babam və ölkəm qarşısında borc hesab edirəm. Mən bu sözü Gürcüstana gəlməmişdən əvvəl özümə vermişəm və gəldiyim ilk gündən məni hərəkətə gətirən də bu məqsəddir. Mən Konstitusiyaya and içərkən sizə bu sözü vermişəm. Biləsiniz ki, nə özümə, nə andıma, nə də xalqıma xəyanət etməyəcəyəm!

Mən sizin səsinizi eşidir və hansı hisslər, emosiyalar ilə dolu olduğunuzu bilirəm. Bilirəm ki, qəlbinizdə müəyyən qeyri-müəyyənlik, çaşqınlıq və hətta qorxu var. Bilirəm ki, indiyə qədər hamımızın uğrunda mübarizə apardığımız şeylərin sanki bizdən uzaqlaşdığını düşünmək necə dözülməzdir, amma onu da bilirəm ki, gürcü xalqı buna imkan verməyəcək!

Biz buna imkan verməyəcəyik! Biz burada, bu məqsəd ətrafında birləşmiş, müstəqillikdən əvvəl Gürcüstanı xatırlayan və müstəqilliyi bərpa etmək kimi müqəddəs məqsədə nail olacağımıza inanan insanlarıq, siz isə müstəqil, azad Gürcüstanda doğulmuş və başqa Gürcüstanı təsəvvür edə bilməyən insanlarsınız. Məhz, buna görə, təsəvvür edə bilməzsiniz, çünki siz azadsınız, müstəqilsiniz və heç vaxt köləliyi qəbul etməyəcəksiniz. Bu gün sizinlə və yeni nəslin ahəngi ilə yeni Gürcüstan doğulur və yeni enerji yaranır.

Gürcüstan öz tarixində dəfələrlə olduğu kimi, bir daha bizə əsl üzünü göstərdi - qorxusuz, paxıllıqsız və nifrətsiz; Ölkənin yeni enerjisi, yeni söz, yeni qavrayış, cəsarət, sevgi, birlik və ləyaqətlə gəlir və buna heç nə mane ola bilməz!

Heç kim bugünkü Gürcüstanı başqalarının inancları, doqmaları və buxovları ilə yenidən yaşamağa məcbur edə bilməz; Ona görə də mən qəti şəkildə inanıram ki, heç kim Gürcüstanı keçmişə qaytara bilməyəcək. İnanıram və sizi inandırmaq istəyirəm ki, biz çıxılmaz vəziyyətdə deyilik, qapalı dairədə hərəkət etmirik, nə ümidsizliyin, nə də nihilizmin bizdə yeri yoxdur. Ölkəmizin taleyi öz əlimizdədir və həllini özümüz tapmalıyıq

Bu ölkənin müstəqilliyinin, təhlükəsizliyinin və xarici siyasətinin təminatçısı kimi mən bu problemin həllində öz məsuliyyətimi görürəm. Bir həll var və o, aydın şəkildə qarşımızdadır və bu həll nədir:

İlk olaraq, Avropa yolumuzu xilas etmək bu həllin təməl daşıdır.

Bu gün, Rusiyanın kölgəsinin üzərimizdə göründüyü zaman, Avropa və Amerika ilə tərəfdaşlıq və yaxınlaşma müstəqilliyimizi, sülhü qoruyub saxlamaq və möhkəmləndirmək üçün həqiqi yoldur. Kim bu yolu sabotaj edir, sarsıdırsa, ölkəmizin dinc və təhlükəsiz gələcəyini, azad və demokratik dünyanın tamhüquqlu üzvü olmaq yolunu tapdalayır.

Avropa İttifaqı azadlıq məkanıdır, heç bir ölkənin onun və xalqının iradəsi olmadan qoşulmadığı, açıqlıq, ədalət və inkişaf yoludur. Ən kiçik millətin belə, dilinin, inancının, kimliyinin, adət-ənənəsinin qorunub saxlandığı yerdir.

Bu, insanın, ailənin, onun təhlükəsizliyinin, sağlamlığının, sosial vəziyyətinin, şəxsi həyatının, ləyaqətli qocalığının qorunduğu, bütün insan hüquqlarının qorunduğu ittifaqdır.

Avropa Birliyi öz mahiyyətinə və ideyasına görə sülh üçün yaradılmışdır, Avropada heç bir müharibə partiyası yoxdur, yarandığı gündən Avropa İttifaqı tərəfindən heç bir müharibə başlanılmayıb. Əvəzində əsl müharibə partiyası tək və yeganədir ki, biz onu bu gün hətta işğal olunmuş ərazilərimizdə də görürük - bu, Rusiya imperializmidir. Avropa İttifaqı bizim üçün azad dövlətlərin ittifaqıdır, onun çərçivəsində ölkəmizə öz müstəqilliyini qorumaq, sülh və təhlükəsiz şəraitdə özünü inkişaf etdirmək imkanı verilir.

Biz bu yola 33 il əvvəl qədəm qoymuşuq və bu yolda avropalı və amerikalı dostlarımız həmişə bizim yanımızda olub, dövlətimizin quruculuğuna, inkişafına dəstək veriblər. Bizi mənəvi, siyasi, maddi və qurumlar cəhətdən dəstəkləyirdilər. Bu gün, kimlərin düşmən, kimin dost olduğuna bəzi insanları inandırmalı olmağım məni təəccübləndirir. Biz, ərazilərimizi kimin əlimizdən alıb, ərazi bütövlüyümüzü kimin pozub və suverenliyimizi, tanınmamaq siyasətimizi kim qoruduğunu bilirik; Biz gürcü dilinin öyrənilməsini kimin qadağan etdiyini və gürcü əlifbasını kimin tanıyıb qoruduğunu bilirik; Biz, məktəblərimizi kim dağıdıb, kim tikdirdiyini bilirik; Kilsəmizin qapısını kimin bağladığını və kilsə-monastırlarımızı bərpa etmək və xilas etməkdə bizə kömək edənləri bilirik; Biz, gürcü şərabına kimin deyindiyini və Gürcüstanı şərabın vətəni kimi kimin qiymətləndirdiyini bilirik? Ordumuzun kimin köməyi ilə müasir, beynəlxalq standartlarla təchiz olunduğunu bilirik? Kənd təsərrüfatının kimin köməyi ilə gücləndiyini və bir çox sayı-hesabı olmayan hallarda bizə düşmənin nə etdi, dost nə etdiyini yaxşı bilirik. Ona görə də, konstitusiyamızda əksini tapmış xarici siyasət bizim alternativsiz gələcəyimizdir.

Çıxış yolunun ikinci təməl daşı sabitlikdir. Bu regionda və bu geosiyasi vəziyyətdə bizim üçün dinc proseslərdən başqa həll yolu yoxdur. İnqilablar, dövlət çevrilişi, destruksiya və ya sabitliyin pozulması həll yolu deyil və ola da bilməz. Biz çox gözəl bilirik ki, bu, kənarda yalnız düşmənimizə əl verir, daxildə isə - dinc prosesin təxribat kimi qələmə verilməsinə, qorxudulmağa, repressiyalara və nəhayət, avtoritar rejimin güclənməsinə töhfə verir.

Sabitliyi qorumağın yeganə yolu seçkilərdən keçir. Seçkilər demokratiyanın yeganə yolu və yeganə ölçüsüdür, seçkilər demokratiyanın əsas sınağıdır, buna görə də bizim Avropa İttifaqına daxil olmağa hazırlığımız qiymətləndirilməlidir. Bu seçkilərlə biz əsas seçimi etməliyik: ya Avropalı, demokratik, müstəqil Gürcüstan, ya da rus tipli rəhbərliyə malik, avtoritar və təcrid olunmuş Gürcüstan! Belə seçim xalq referendumu adlanır.

Odur ki, qarşıdan gələn seçkilər bu ölkə üçün 1918-ci il seçkiləri və ya 1991-ci il referendumu kimi əhəmiyyətli - yəni ölkənin tarixi qərarı olacaq! Xalqın səsi və xalqın iradəsi gürcü millətini yenidən dünyaya gətirməli, özünə və onun imkanlarına inamı bərpa etməlidir.

Biz özümüzə sübut etməliyik ki, biz hər şeyi edə bilərik və heç kim bizim gələcəyimizi əlimizdən ala bilməz! Bu seçkilərlə biz gənclərin və nəinki təkcə gənclərin gözləntilərinə cavab verməli, vətəndaşlarımızın üzünə imkanlar meydanını açmalıyıq. Onlar ölkədən getməyi deyil, bu torpağın onların olduğunu düşünməli və ölkənin gələcəyinin səhifəsini yazmalıdırlar.

Həll yolu həm də 33 ildə nail ola bilmədiyimizdən, yəni ölkənin “desovetləşdirilməsindən” – yəni sovet quruluşunun qalıqlarının kökündən qoparılmasından keçir. Biz o qaranlıq keçmişi səciyyələndirən hər şeyi - təcrid, müharibə, mövcud olmayan düşmən obrazı, sui-qəsdlər və onların nəzəriyyələri, qarşıdurma, repressiya, senzura, dinləmə, təqib, gizli qeydlər, kompromatlar, köləlik, vəfasızlıq, yalan, yadlaşma, qorxu və komformizmi  kökündən silməliyik.

Keçmişin keçmişə təhvil verməliyik. Bugünkü vəzifəmiz azad gələcəyə yol açmaqdır. Bu gün şahidi olduğumuz və iştirak etdiyimiz köhnə dövrün sonu, yeni dövrün başlanğıcıdır!

Biz özümüzü keçmişdən azad edib, işğaldan azad olmalıyıq. İşğaldan azad olmağın yeganə dinc və real yolu heç bir gizli sövdələşmələr və yalan vədlər ehtiva etməyən Avropa yoludur. Əvəzində biz faktiki olaraq işğal olunmuş Abxaziya və Tsxinvali regionunun cəmiyyətinə hərbi bazalar və səfərbərlik olmadan birgə inkişaf, insan hüquqlarının real müdafiəsi və real sülh perspektivi vəd edə bilərik.

Məhkəmə sistemi azad edilməlidir - ədalət və ədalətli mühakimə hüququ bütün vətəndaşlarımızın tələbidir. Hamımız bilirik ki, buna məhkəmələrə təzyiq və təsir aradan qaldırılmadan nail olmaq mümkün deyil. Hər kəs bilir ki, məhkəmə Avropa dövlətinin və onun sabitliyinin əsas təməl daşıdır.

Avropa yolu həm də iqtisadiyyatın və biznesin azadlığıdır və qanunvericilik və məhkəmələr bu azadlığın silahıdır. Əgər hüquqi məkana etimad yoxdursa, o zaman nə sabitlik, nə də uzunmüddətli təşəbbüs, investisiya olmayacaq. Əvəzində Avropa qanunvericiliyi biznesi hər hansı qeyri-qanuni və ya siyasi müdaxilədən qoruyur, bütövlükdə biznes mühitini yaxşılaşdırır və yeni potensialın yaranmasına və böyüməsinə imkan verir. Sadəcə olaraq, heç kim sizə səhmlərinizdən imtina etmək və ya başqa xərac ödəmək üçün zəng etməyəcək. Azad edilmiş gürcü biznesi Avropa bazarını mənimsəmək üçün real potensiala malikdir.

Vətəndaşlar sosial təminatlar vasitəsilə azad olmaq istəyirlər - Gürcüstan vətəndaşı üçün Avropa sosial qanunvericiliyinə yaxınlaşmaq onun şəxsi, ailə, iş və ictimai məkanının qorunacağı deməkdir ki, bu da insan ləyaqətinin qorunmasının ilk əlamətidir.

Azadlıq dövlət qulluğuna da şamil olunmalıdır – azad dövlət xidməti şəxsi maraqlara, təsirlərə və partiyaların diktəsinə deyil, həqiqətən dövlətə xidmət etmək deməkdir. Avropa məhz buna əsaslanır. Hökumətlər, iqtidar partiyaları gəlib-gedir, ayrı-ayrı dövlət qulluqçularının fəaliyyətinə heç kim qarışmır, onlara harasa gəlməyi, yaxud gəlməməyi, nəsə deməyi tapşırmır, qadağan etmir və s.; Siyasi spektr dəyişir, məmur qalır və siyasətin, sabitliyin və dövlətin ardıcıllığı, yaxud inzibati yaddaş onun əlində qalır. Qorxudan, revanşizmdən azad olan məmur ölkənin gələcəyinin ən yaxşı sütunudur.

Azad mədəniyyət də azadlığın əlamətlərindəndir, çünki azadlıq yoxdursa, mədəniyyət də yoxdur. Gürcüstanı həmişə səciyyələndirən yaradıcılıq enerjimizdir. Azad Gürcüstan bu gün də dünya səhnəsini, qalereyaları, ədəbi aləmi fəth edir. Amma bu istiqamətdə ona senzura və təqib yox, daha çox dəstək və daha çox azadlıq lazımdır. Bu, Gürcüstanın həqiqətən də istənilən Avropa ölkəsi ilə rəqabət apara biləcəyi və öz yerini tuta biləcəyi sahədir.

Heç kim müstəqil idmançını, heç vaxt yenidən siyasət girdabına qatmamalıdır. İdmançıların qələbələrini mənimsəmək, medallarını, uğurlarını mənimsəmək və bütün bunları hakim komandanın ləyaqəti kimi göstərmək totalitar rejimin xarakterik xüsusiyyətidir. Bu, onların qələbəsi deyil - bu, idmançıların və bütövlükdə ölkənin qələbəsidir, ona görə də onlar Gürcüstanın bayrağını və himnini bütün dünyaya təqdim edərkən biz bütün sevinci və qüruru bölüşürük.

Bu, azadlığa aparan yoldur və mütləq izlənməlidir. Azadlıq siyasi məkana şamil olunmasa, bu yolla gedə bilmərik: sovetdən qalma təkpartiyalılıq, bütün dövlət qurumlarının və ictimai strukturların bir partiyanın inhisarında olmasından başqa bir şey deyil. Dövlət maraqlarını rəhbərin və partiyanın maraqlarına tabe etmək sovet ənənəsidir.

Mentalitetimiz və yaddaşımız sovet qalıqlarından azad edilməlidir; Məhz bu azad edilmiş yaddaş üzərində gələcəyimiz qurulmalıdır ki, biz heç vaxt sovet keçmişinin təkrarlanmasına imkan verməyək. Bütün bunların əsas müdafiəçisi müstəqil ölkədə azad cəmiyyət və azad düşüncə - təzyiqdən və qorxudan uzaq - müstəqil insandır. Yaşasın müstəqil və azad Gürcüstan!”.