Parlament müxalifətinin üzvləri Rusiya vətəndaşları üçün Gürcüstan sərhədinin dərhal bağlanmasını tələb edirlər. Parlamentin üzvü və “Strategiya Ağmaşenebeli”nin lideri Giorgi Vaşadzenin fikrincə, sərhədin bağlanması milli maraqlar üçün “həddən artıq təhlükədən” qaçmaq üçün yeganə çıxış yoludur.
Əsas xəbərlər
“Son bir neçə gündə hər gün on minlərlə Rusiya vətəndaşı Gürcüstana daxil olur və Lars keçid məntəqəsində böyük növbəyə durur. Müvafiq olaraq, tələbimiz Rusiya vətəndaşları üçün dərhal sərhədin müvəqqəti bağlanmasıdır. Yalnız üç istisna olsun: Gürcüstan vətəndaşlarının öz vətənlərinə qayıtmaq, Rusiya Federasiyasındakı gürcü olan soydaşlarımızın Gürcüstana daxil olması; hər hansı bir xüsusi hal varsa, humanitar məqsədlər üçün Gürcüstana daxil olmaq. Yaxın həftələrdə Gürcüstan əhalisinin 10 faizi Rusiya vətəndaşları olacaq. Bu da, Gürcüstanın milli maraqlarına təhlükə olacaq”, - deyə Vaşadze bildirib.
“Strategiya Ağmaşenebeli” Rusiya vətəndaşlarının Gürcüstana girişinin qadağan edilməsi ilə bağlı petisiya da dərc edib:
Sentyabrın 6-da Vladimir Putin tərəfindən təsdiq edilmiş “Rusiyanın xaricdə humanitar siyasətinin yeni konsepsiyası” xüsusilə narahatedicidir. Yeni konsepsiyada vurğulanır ki, Latviya, Litva, Estoniya, Gürcüstan və Moldova ilə münasibətlərdə bu ölkələrdə rusdilli əhalinin hüquqlarının müdafiəsi məsələsi nəzərə alınacaq. Rusiya indiyədək dəfələrlə sözdə “rusdilli və Rusiya vətəndaşlarının maraqlarının müdafiəsini” özünün aqressiv işğal strategiyası və hərbi əməliyyatları üçün bəhanə edib. Bu, 2008-ci ildə Gürcüstana hücum zamanı, 2014-cü ildə Ukraynaya hücum zamanı və yenidən 2022-ci ildə Ukraynaya hücum zamanı, belə də oldu. Nəticədə Gürcüstan və Ukraynanın əraziləri işğal və anneksiya edilib”.
“Lelo” partiyası viza qaydalarının tətbiqi üçün qanunvericiliyə dəyişikliklərin təşəbbüskarı olmaq məsələsini nəzərdən keçirir. Partiyanın nümayəndəsi Salome Samadaşvilinin sözlərinə görə, Avropa İttifaqının Rusiya vətəndaşlarına viza verilməsi qaydalarını sərtləşdirdiyi, bir neçə üzv dövlətin isə ümumiyyətlə sərhədlərini bağladığı bir şəraitdə Gürcüstan “ən asan yer” olaraq qalır. Vizasız girib qala biləcəkləri yer.
“Təhlükəsizlik problemlərimizi nəzərə alaraq, Rusiya Federasiyası ilə viza rejiminin tətbiqini müzakirə etmək lazımdır. Hökumət bu istiqamətdə heç bir addım atmadığına, hətta bunu müzakirəyə çıxarmayacağını birbaşa bəyan etdiyinə görə, biz Gürcüstan parlamentində müvafiq qanunvericilik dəyişikliklərinin qəbulunun müzakirəsinə başlamaq təşəbbüsü ilə çıxış edirik.
Hesab edirik ki, Rusiya vətəndaşları üçün ciddi və qısamüddətli viza rejiminin tətbiqi ilə bağlı icra hakimiyyətinə tapşırıq verən “Əcnəbilərin və vətəndaşlığı olmayan şəxslərin hüquqi statusu haqqında” qanuna dəyişikliklər edilməlidir.
Aydındır ki, müəyyən istisnalara yol vermək lazımdır”, - deyə Samadaşvili qeyd edir.
Rusiya prezidenti Vladimir Putinin Ukraynadakı müharibəyə qismən səfərbərlik elan etməsindən sonra vətəndaşlar kütləvi şəkildə ölkəni tərk edirlər. KİV-in məlumatına görə, sentyabrın 21-dən sonra 261 min kişi Federasiyanı tərk edib. Bu səbəbdən Rusiya sərhədlərini hərbi xidmətə çağırılan vətəndaşlar üçün bağlamağı düşünür.
Gürcüstanla Rusiya arasında birbaşa uçuşlar dayandırılıb. Rusiya vətəndaşları Gürcüstana üçüncü ölkədən və ya quru sərhədindən, Yuxarı Lars tərəfdən daxil ola bilərlər. Sentyabrın 22-dən Rusiya-Gürcüstan sərhədində bir neçə kilometrlik avtomobil növbəsi yaranıb.
Şimali Osetiya vitse-premyeri İrbek Tomayevin məlumatına görə, son bir həftədə hər iki istiqamətdə 37 min avtomobil və 115 mindən çox insan sərhədi keçib.
Gürcüstanın maliyyə naziri Laşa Xutişvilinin sözlərinə görə, ölkəyə daxil olan və gedənlərin sayının artması ilə əlaqədar gömrük idarəsi xüsusi şəraitində işləyir:
“Hamımız görürük ki, axınlar artıb. Gəlişlər çoxalıb, necə yüklərin istiqaməti, eləcə də Gürcüstan sərhədini keçən fiziki şəxslər. Bu istiqamətdə vəziyyət nəzarət altındadır.
Sərhədin keçməsi ilə bağlı dramatik vəziyyət yoxdur. Gömrük-sərhəd nəzarəti müəyyən edilmiş qaydalar üzrə həyata keçirilir ki, bu da o deməkdir ki, keçid məntəqələrində müvafiq məlumatlar toplanır, təhlillər aparılır və yalnız bundan sonra bu və ya digər şəxslərlə bağlı qərar qəbul edilir.
Rusiya Federal Təhlükəsizlik Xidməti zirehli transportyor (БТР) və Rusiya hərbçilərini Rusiya-Gürcüstan sərhədi yaxınlığında yerləşdirib ki, rəsmi prosedurları pozaraq, ehtiyatda olan hərbçilər sərhədi yarmasınlar. Təhlükəsizlik xidməti yayılan məlumatı ki, guya sərhəddə blokpost məntəqəsinin yaradılması planlaşdırılır, yalanlayıb.
Gürcüstanın daxili işlər naziri Vaxtanq Qomelaurinin sözlərinə görə, dünən Gürcüstan Rusiya vətəndaşlarının axınının artması ilə əlaqədar Lars sərhəd-keçid məntəqəsinə əlavə polis qüvvələri göndərib.
