Gürcüstan parlamentinin sədri Şalva Papuaşvili növbəti dəfə qeyri-hökumət təşkilatlarına hücum edib və onların bəzilərinin “radikal siyasətçilərin” müttəfiqləri olduğunu bildirib.
Əsas xəbərlər
Papuaşvili parlamentin 2023-cü il üzrə fəaliyyətinin hesabatını təqdim edərkən qeyri-hökumət təşkilatlarını dezinformasiya yaymaqda da ittiham edib.
“Hökumətin və cəmiyyətimizin dezinformasiyaya qarşı təkbaşına mübarizə aparması acı bir reallıqdır. Yaxşı hallarda susurdular, bəzi hallarda isə, bu da bir qayda olaraq hadisələrə neytral mövqedən qiymət vermək əvəzinə, qeyri-hökumət təşkilatlarının özləri dezinformasiyanın yaradılmasında və yayılmasında iştirak edirdilər. Təəssüf ki, Gürcüstan reallığında bir neçə belə təşkilat tez-tez dezinformasiyanın birgə yayılmasında müxalifətlə rəqabət aparır və hətta onu üstələyir. Qeyri-hökumət sektorunun cəmiyyətin maraqlarını ifadə etməli olan hissəsi faktiki olaraq radikal siyasətçilərin müttəfiqinə çevrilib”, - Papuaşvili bildirib.
Parlament sədrinin fikrincə, “xalq radikallara qulaq asmır”, lakin “radikal partiya və təşkilatların dezinformasiyası” o zaman təsirli olur ki, Gürcüstanın bəzi strateji tərəfdaşları “istəksizcə dezinformasiya kampaniyasının iştirakçılarına çevrilirlər”.
“Bunun ən yaxşı nümunəsi ötən ilin mart aksiyaları və Gürcüstanda xaricdən daxil olan, bəzi hallarda müxtəlif təşkilatlar və onların müttəfiq siyasi partiyaları tərəfindən məqsədyönlü olmayan və qeyri-qanuni istifadə olunan vəsaitlərin şəffaflaşdırılması niyyətimizə qarşı yönəlmiş kampaniya idi”, - Şalva Papuaşvili qeyd edib və əlavə edib ki, qeyri-hökumət sektoru qərarların qəbulu prosesində iştirak edən qurumlar arasında ən qeyri-şəffafdır.
Papuaşvili iddia edir ki, “Gürcü Arzusu”nun 2023-cü ilin martında kütləvi etirazlar və beynəlxalq təzyiqlər səbəbindən qəbul edə bilmədiyi qanun layihəsi “heç bir halda agentlər haqqında qanun və ya Rusiya qanunu deyildi”.
