Raca sakinləri (həmçinin təkcə Raca sakinləri yox) “Mtis Ambebi”dən öyrəniblər ki, “Gürcü Arzusu” hökuməti daha 700 hektar ərazini rusiyalı oliqarxın biznes ortağı şirkətinə verib. Hökumət bu qərarı Davit Xidaşeliyə maral və bizon yetişdirmək məqsədi ilə yarım əsr ərzində Raca və Kvemo Svanetidə 105 min hektara qədər meşə sahəsi verənədək almışdı.

700 hektar torpağın verilməsi sxemi Davit Xidaşeli keysi ilə eynidir

Hökumətin 2036-cı ilə qədər Ğebi, Qlola, Şovi, Uravi və Qadamşidə qızıl tapıntısı üçün lisenziya verdiyi şirkət gürcü şirkətidir və Tbilisidə əsası qoyulub.

Müəssisə 2015-ci ildə qeydiyyata alınıb və yarandığı gündən 2021-ci ilə qədər səhmlərin 94 %-i Aleksandr Xarebavaya məxsus olub. 2021-ci ilin noyabrında Aleksandr Xarebava “Gürcü Perspektivi”nin 94 %-ni alqı-satqı müqaviləsi ilə Murman Tsotsoriaya 200 lariyə satdı. Hazırda “Gürcü Perspektivi” MMC-nin Oni bələdiyyəsində artıq dörd qızıl tapıntı lisenziyası var:

-Qlola kəndi və Şovi kurortunun yaxınlığında - 260,84 hektar, bunun üçün o, 143 550 lari ödəyib;

-Ğebi kəndinin ətrafı (dörd rayon), 46,44 hektar sahə - satış qiyməti 25.850 lari;

-Uravi kəndi ətraf ərazisi 321,14 hektar sahə - satış qiyməti 177.100 lari;

-Qadamşi kəndi yaxınlığı, 70,32 hektar sahə - satış qiyməti 39.050 lari;

Murman Tsotsoria 2006-cı ildə Britaniyanın Virciniya adalarında qeydiyyatdan keçmiş "Dizon Limited"in təsisçisi və "Dizon Limited Gürcüstan nümayəndəliyi”nin direktorudur. Bu şirkət Aleksandr və Tengiz Xarebav qardaşlarına məxsusdur. 2006-cı ildə Moskva notariusu tərəfindən təsdiq edilmiş sənədə əsasən "Dizon Limited"in Gürcüstandakı rəsmi nümayəndəsi Aleksandr Xarebava idi və müəssisə də ona məxsus ərazidə qeydiyyata alınıb.

Tengiz Xarebava Gürcüstan və Rusiya vətəndaşıdır. O, Kaluqa vilayətində qeydiyyatdan keçmiş aktiv əczaçılıq maddələri istehsal edən "Bion" MMC şirkətinin 17 %-nə sahibdir. Həmin şirkətin ən böyük payı, 62 %-i “Farmapolis” MMC-yə məxsusdur, bu şirkətin 99,9 %-i isə “Sənaye İnvestisiyaları” MMC-yə məxsusdur. Bu müəssisə rusiyalı oliqarx Mixail Şelkov tərəfindən təsis edilib və səhmlərin 99 %-nə sahibdir.

Mixail Evqeni oğlu Şelkov “VSMPO-AVISMA” korporasiyasının əsas səhmdarıdır. O, korporasiyanın səhmlərinin 65,3 %-nə sahibdir və korporasiyanın direktorlar şurasının sədr müavinidir. “VSMPO-AVISMA” dünyanın ən böyük titan istehsalçısıdır. Titan kimya və hərbi sənayedə istifadə olunur. Şelkov hələ müharibə başlamazdan əvvəl Ukrayna hökuməti tərəfindən sanksiyaya məruz qalmışdı. Şelkov "Rosoboroneksport"da işləyirdi, o deyirdi ki, buraya Sergey Çemezovun sayəsində gəlmişdi. “Forbes” yazırdı ki, Çemezov Putinin dostudur və o, de fakto “Rosoboroneksport”u idarə edirdi. Sözügedən dövlət qurumu hərbi və ikili təyinatlı məhsullar, xidmətlər və texnologiyalar ixrac edir. Hazırda Sergey Çemezov "Rostex" dövlət korporasiyasının baş direktorudur. “Rostex”  2007-ci ildə Putinin imzaladığı qanun nəticəsində yaradılıb.

Bir il əvvəl “Mtis Ambebi” xəbər vermişdi ki, Gürcüstan hökuməti ovçuluq təsərrüfatının təşkili üçün Raca və Kvemo Svanetidə 104.712 hektar meşə sahəsini 49 il müddətinə Davit Xidaşelinin şirkətinə verib. Xidaşeliyə köçürülən meşə fondu Laqodexi, Vaşlovani, Cavaxetiya, Eruşeti milli parklarından xeyli böyükdür. Davit Xidaşeli Rusiyanın ən böyük “Sistem” korporasiyasının keçmiş vitse-prezidenti, Putinə yaxın rus oliqarxı Vladimir Yevtuşenkovun şəriki və dostudur. Ovçuluq təsərrüfatlarının yaradılması üçün verilən ərazi Rusiya Federasiyası və işğal olunmuş Sxinvali rayonu ilə həmsərhəddir.

2022-ci il dekabrın sonunda Racada, Mamison aşırımının yaxınlığında yerləşən Şovi kurort ərazisində "Gürcü Arzusu" ilə əlaqəli qruplar 18 metrlik mehmanxana tipli yaşayış binaları tikmək hüququ əldə etdilər. Yerli sakinlər Şovidəki mənzilləri Ukraynada müharibə başlayandan sonra kütləvi şəkildə Gürcüstana köçmüş Rusiya vətəndaşlarının alacağından qorxurlar. Sərhəd bölgəsində Rusiya vətəndaşlarının şəxsi mülkiyyətinə sahib olması təhlükələri daha da artıracaq. Şovi kurortu Gürcüstan hakimiyyətinin nəzarətində olan sərhədlər daxilində Mamison aşırımı vasitəsilə Gürcüstan və Şimali Osetiyanı (Alaniya) birləşdirən Osetiya hərbi yolunun sonuncu nöqtəsidir. Mamison aşırımı 2009-cu ildən Rusiya tərəfindən işğal olunub. İşğal xəttinin o tərəfində isə Çançaxi çayı vadisinin bir hissəsi, Mamisona gedən magistralın 2 kilometrlik hissəsi və yaşayış olmayan Ğurşev kəndidir. Tərəfdaşlıq Fondunun icraçı direktoru və Bidzina İvanişvilinin etibarlı adamı Davit Saqanelidze 2020-ci il sentyabrın 2-də Onidə əhali ilə görüşü zamanı bu yolun açılmasının zəruriliyindən danışırdı. Rusiya tərəfində bu yolun tikintisi fəal şəkildə davam edir və 2022-ci il dekabrın 13-də Mamison aşırımına ən yaxın inzibati mərkəz olan Nijni Zaramaqa yarım kilometrlik tunel açılıb. Rusiya Prezidenti Vladimir Putin tədbirə distant şəkildə qoşulmuşdu.

Əvvəl Gürcüstanda, sonra isə Ukraynada Rusiyaya qarşı döyüşən Raca sakini Vaja Tsatsadze əmindir ki, Rusiyanın məqsədi xüsusilə faydalı qazıntılarla zəngin olan Yuxarı Racanı ələ keçirməkdir - insansız kəndlər bir tərəfdən Gürcüstan hökumətinin rus qərarlarını, digər tərəfdən də Rusiyanın gürcü torpaqlarına daha asan sahiblik əldə etməsini asanlaşdırır.

Raca Gürcüstanda əhalisinin ən çox qaçıb getdiyi bölgədir. Son 20 ildə isə azalma 40 %-ə qədərdir. Zemo Racanın 13 kəndində cəmi bir və ya iki nəfər yaşayır, 6 kənd artıq boşalıb. Ölüm nisbəti doğum nisbətindən üç dəfə çoxdur.

Racanın 30 %-dən çoxu, 49 ildir ki, hazırda Putinin müttəfiqlərinin əlindədir.

İllərdir Racada milli parkın yaradılmasının qarşısının alınmasının əsas səbəblərindən biri də budur.

Gürcüstan xəbərləri
Gürcüstan xəbərləri
müstəqil, ictimai-siyasi onlayn nəşrdir. Vebsayt İnformasiya Resursları Şəbəkəsi (IRN) tərəfindən idarə olunur