2024 წლის მოსახლეობის აღწერის დაზუსტებული შედეგების მიხედვით, საქართველოს მოსახლეობა 3,929,581 ადამიანს შეადგენს. 2014 წლის აღწერასთან შედარებით, ქვეყნის მოსახლეობა 5.8%-ით (215,777 ადამიანი) არის გაზრდილი, თუმცა, მონაცემები აჩვენებს, რომ დადებითი დინამიკა მხოლოდ თბილისში, აჭარასა და ქვემო ქართლში ფიქსირდება, ყველა დანარჩენი რეგიონი კი მცირდება.
ახალი ამბები
მკითხველის რჩეული
- 1 სამხარაძე: არაბმა პარტნიორებმა ინვესტიციების წინააღმდეგ კამპანიაზე რეაგირება გვთხოვეს
- 2 აბასთუმნის თავზე ფრენა აიკრძალა - რატომ ჩაკეტა სახელმწიფომ ცა იქ, სადაც ივანიშვილი ცხოვრობს
- 3 უცხოეთში მყოფ წვევამდელებს ჯარში გაწვევისას საქართველოში დაბრუნება მოუწევთ
- 4 საქართველო ევროპაში ბოლო ადგილზეა: პენსია ძირითადი ხარჯების მხოლოდ 22%-ს ფარავს
- 5 მეუფე ისაია უარყოფს, თითქოს კანდიდატურა მოსაყდრე შიოს სასარგებლოდ მოხსნა
- 6 პოლონეთში 5 თვის ჩვილის გარდაცვალების საქმეზე ნუგზარ ქავთარაშვილს ეძებენ
სტატისტიკის ეროვნული სამსახურის ანგარიშის მიხედვით, დეპოპულაცია ყველაზე მკვეთრად სამეგრელო-ზემო სვანეთში გამოიკვეთა, სადაც მცხოვრებთა რაოდენობა 25,164 ადამიანით (-7.6%) შემცირდა.
კლების ტენდენცია ნარჩუნდება სხვა რეგიონებშიც: იმერეთში მოსახლეობამ 23,165-ით იკლო (ამჟამად 510,741); კახეთში 14,750-ით (ამჟამად 303,833); შიდა ქართლში - 11,646-ით (ამჟამად 251,736), ხოლო გურიაში - 10,942 მცხოვრებით (ამჟამად 102,408).
მცირე პოპულაციის გათვალისწინებით, კლების ტენდენცია განსაკუთრებით საგრძნობია რაჭა-ლეჩხუმსა და ქვემო სვანეთში, სადაც მცხოვრებთა რაოდენობა 32,089-დან 29,901-მდე შემცირდა. ანალოგიური დინამიკა ვლინდება სამცხე-ჯავახეთშიც - აქ მოსახლეობის მაჩვენებელი 160,504-დან 155,282-მდე ჩამოვიდა.
ბოლო აღწერის მონაცემებით, თბილისში 1,331,485 ადამიანი ცხოვრობს, რაც საქართველოს მოსახლეობის 34%-ია. ათი წლის განმავლობაში თბილისის მოსახლეობა 20%-ით (222,768 ადამიანი) გაიზარდა - 2014 წელს დედაქალაქს 1,108,717 მცხოვრები ჰყავდა.
მოსახლეობის რიცხოვნობის მიხედვით მეორე და მესამე ადგილს კვლავ იმერეთის (510,741) და ქვემო ქართლის (441,630) რეგიონები იკავებენ, რომლებზეც მოსახლეობის 13% და 11% მოდის. თუმცა 2014 წელთან შედარებით, იმერეთში მოსახლეობა დაახლოებით 4%-ით, ანუ 23,165 ადამიანით შემცირდა, ქვემო ქართლში კი პირიქით, 4%-ით (423,986-დან 441,630-მდე) გაიზარდა და იქ 17,644 ადამიანით მეტი ცხოვრობს.
მოსახლეობის ზრდა ფიქსირდება აჭარის ავტონომიურ რესპუბლიკაშიც, სადაც 2014 წელს 333,953 ადამიანი ცხოვრობდა, 2024 წლის ბოლოსთვის კი 402,929. აჭარაში ზრდის პროცენტული მაჩვენებელი 20.6%-ია (68,976 ადამიანი).
საქართველოს მოსახლეობის გენდერული ბალანსი ქალების სასარგებლოდ იხრება: მოსახლეობის 52% (2 048 577) ქალია, ხოლო 48% (1 881 004) - კაცი. ქალების ყველაზე მაღალი წილი (54%) თბილისსა და ქუთაისშია, ხოლო მარნეულში, საგარეჯოში, ხარაგაულსა და აჭარის ზოგიერთ მუნიციპალიტეტში (ქედა, ხელვაჩაური) ეს მაჩვენებელი შედარებით დაბალია და 49%-ს შეადგენს.
სიცოცხლის ხანგრძლივობის მხრივ ქალები მკვეთრად ლიდერობენ - 85 წლისა და უფროსი ასაკის ჯგუფში ქალების რაოდენობა 2.6-ჯერ აღემატება კაცებისას.
ქვეყანა სულ უფრო მეტად ხდება ურბანიზებული: მოსახლეობის 62% ქალაქებში ცხოვრობს, ხოლო 38% სოფლად.
რაც შეეხება ასაკს, ქვეყნის „ბირთვს“ წარმოადგენს სამი ძირითადი ჯგუფი: 35-39 წელი (7.6%); 10-14 წელი (7.4%); 30-34 წელი (7.2%).
