ადვოკატთა ასოციაციის თავმჯდომარის ასარჩევად II ტური გაიმართება

არჩევნებში ასოციაციის თავმჯდომარეობის მსურველი ექვსი კანდიდატი დარეგისტრირდა  – ნიკოლოზ კვანტრიშვილი, გიორგი მარიამიძე, მუხრანი ღურწკაია, ირაკლი ყანდაშვილი, ირაკლი ჩომახაშვილი და მანუჩარ ჭუმბურიძე.

14 დეკემბერს გამართულ პირველ ტურში სულ 2751 ადვოკატმა მიიღო მონაწილეობა. ირაკლი ჩომახაშვილმა 1109 ხმა მიიღო, ირაკლი ყანდაშვილმა კი – 1283. თავმჯდომარე პირველივე ტურში არჩეულად ჩაითვლებოდა, თუ ერთ-ერთი კანდიდატი ხმების უბრალო უმრავლესობას (50%+1), ანუ 1376 ხმას მიიღებდა.

არჩევნების მეორე ტური მომდევნო 14 დღის განმავლობაში უნდა ჩატარდეს. გაიმარჯვებს ის კანდიდატი, რომელიც სხვა კანდიდატზე მეტ ხმას მიიღებს.

„იმ პირობებში, როდესაც უამრავი დისკრედიტაცია და ტყუილი ვრცელდებოდა ჩემზე, მინდა, მადლობა გადავუხადო ყველა ადვოკატს, ყველა ჩემს კოლეგას, რომელმაც მხარი დამიჭირა და არჩევნებში მონაწილეობა მიიღო“, – განაცხადა ირაკლი ჩომახაშვილმა, რომელიც პროევროპულ აქციებზე დაკავებული დემონსტრანტების ადვოკატიცაა. ამის გამო სამთავრობო პროპაგანდისტული მედია მას „რადიკალური ოპოზიციის მხარდამჭერად“ მოიხსენიებს.

ირაკლი ყანდაშვილი, რომელიც „ქართული ოცნების“ მხარდაჭერილ კანდიდატად მიიჩნევა, ადვოკატთა ასოციაციის პოლიტიზირების მცდელობაზე საუბრობდა. „ერთ მხარეს არის პროფესია და პროფესიული ინტერესი, მეორე მხარეს - კონკრეტული პოლიტიკური ინტერესი. ეს არის მიუღებელი“, –  ყანდაშვილი ადვოკატებს ჰპირდება, რომ თავმჯდომარედ მისი არჩევის შემთხვევაში, „არავის არ ეღირსება, მოახდინოს ადვოკატთა ასოციაციის, როგორც ინსტიტუციის პოლიტიზირება“.

ბოლო 8 წლის განმავლობაში სსიპ „საქართველოს ადვოკატთა ასოციაციის“ თავმჯდომარე დავით ასათიანია.