ზუგდიდის რაიონული სასამართლოს მოსამართლე გვანცა ვარდოსანიძემ მასწავლებელი მანანა (მიკო) მიქავა სამართალდამრღვევად ცნო და აქციაზე ფეიერვერკის გამოყენებისთვის 5000 ლარით დააჯარიმა.
ახალი ამბები
მკითხველის რჩეული
- 1 უილსონი: თუ ივანიშვილი 29 დეკემბრის გეგმას განახორციელებს, წარმოუდგენელ პასუხს უნდა ელოდეს
- 2 ბალტიის ზღვაში კაბელის დაზიანებაში ეჭვმიტანილი გემის კაპიტანი საქართველოს მოქალაქეა
- 3 რას ამბობს გდდ-ის ყოფილი მაღალჩინოსანი საქართველოდან გამგზავრებამდე მიცემულ ინტერვიუში
- 4 დაძაბულობაა ბოლნისში, სადაც ავტოავარიას ორი არასრულწლოვანი ემსხვერპლა
- 5 Meta ფაქტების გადამოწმების პროგრამას წყვეტს
- 6 გერმანიამ საქართველოში მომიტინგეებზე ძალადობაზე პასუხისმგებელ 9 პირს ქვეყანაში შესვლა აუკრძალა
მანანა მიქავა 16 იანვარს, საღამოს, პოლიციის სამმართველოსთან დააკავეს და დაახლოებით ორ საათში ხელწერილის საფუძველზე გაათავისუფლეს.
„16 იანვარს მე არ ვიმყოფებოდი აქციაზე. პოლიციის სამმართველოსთან მივედი, რათა სამართალდამცავებისთვის ფოიერვერკით მიმელოცა ახალი წელი. [...] რამდენიმე ადამიანის თავშეყრას თუ უკვე აქციად აღიქვამთ, იგივე ქმედებისთვის ბაზარსა და კონცერტზეც უნდა დააჯარიმოთ მოქალაქეები პიროტექნიკის გასროლისთვის“, - წერს სოციალურ ქსელში მიქავა.
მასწავლებელი ამბობს, რომ არ აღიარებს არალეგიტიმური პრეზიდენტის, მიხეილ ყაველაშვილის მიერ ხელმოწერილ კანონებს:
„მე ვარ ქართული ენისა და ლიტერატურის მასწავლებელი, რომელიც მოსწავლეებს ასწავლის ვაჟას, ილიას. ალუდამ მუცალს მარჯვენა არ მოაჭრა და არ დაემორჩილა თემის დადგენილ კანონებს, რადგან ის იყო კანიბალური და მიუღებელი! ასევეა ჩემთვის მიუღებელი ყაველაშვილის ხელმოწერილი კანონები და თუ აქციაზეც მომეხალისება ფეიერვერკი, აუცილებლად გავისვრი“.
16 იანვარს, ზუგდიდში, დააკავეს პარტია „დროას“ წევრი მარიამ სიჭინავა, რომელიც სახელმწიფო რწმუნებულის ადმინისტრაციასთან აირწინაღით მივიდა და ფოიერვერკი გაისროლა. მასთან ერთად დააკავეს სამოქალაქო აქტივისტი კერენ ესებუაც. მანანა მიქავა ერთ-ერთი იყო იმ მოქალაქეებს შორის, ვინც ზუგდიდის პოლიციასთან დაკავებულების მხარდასაჭერად შეიკრიბნენ.
დეკემბერში, პროევროპული აქციების ფონზე, არალეგიტიმურმა პარლამენტმა დაჩქარებული წესით მიიღო საკანონმდებლო ცვლილებები, რომლითაც დემონსტრაციების მონაწილეებს ეკრძალებათ სახის ნიღბით ან ნებისმიერი სხვა საშუალებით დაფარვა, ასევე პიროტექნიკის გამოყენება.
ადმინისტრაციული სამართალდარღვევათა კოდექსის 174-ე პრიმა მუხლის მიხედვით, შეკრების ან მანიფესტაციის მონაწილეების მიერ პიროტექნიკური ნაწარმის ქონა გამოიწვევს სამართალდამრღვევის დაჯარიმებას 5000 ლარის ოდენობით ან ადმინისტრაციულ პატიმრობას 15 დღემდე ვადით, ხოლო თუ სამართალდამრღვევი ორგანიზატორია – მის დაჯარიმებას 15 000 ლარის ოდენობით ან ადმინისტრაციულ პატიმრობას 15 დღემდე ვადით.
