აშშ-ის კონგრესში ივანიშვილის მთავრობის არაღიარების აქტი დარეგისტრირდა

„ქართული კოშმარის არაღიარების აქტის“ სახელით ცნობილი კანონპროექტის ავტორები რესპუბლიკელი კონგრესმენი, ჰელსინკის კომისიის თავმჯდომარე ჯო უილსონი და დემოკრატი კონგრესმენი, ჰელსინკის კომისიის წევრი სტივ კოენი არიან.

კანონპროექტის ტექსტი კონგრესის ვებგვერდზე ჯერ არ გამოქვეყნებულა. Fox News-ის მიერ მოპოვებული დოკუმენტის მიხედვით, „ქართული კოშმარის არაღიარების აქტი“ კრძალავს საქართველოს მთავრობის, რომელსაც ხელმძღვანელობს ბიძინა ივანიშვილი ან ნებისმიერი მარიონეტი, აღიარებას ან მასთან ურთიერთობის ნორმალიზებას „ქართველი ხალხის წინააღმდეგ ივანიშვილის რეჟიმის მიმდინარე დანაშაულების გამო“.

„სანქცირებული ოლიგარქ ივანიშვილის პარტია „ქართული ოცნება“ ახლა პუტინის ინსტრუმენტად იქცა. მათ გააყალბეს ოქტომბრის არჩევნები და უკანონოდ აირჩიეს მორჩილი პრეზიდენტი. ამერიკის შეერთებულმა შტატებმა არ უნდა აღიაროს და არ აღიარებს ამ არალეგიტიმურ მთავრობას.

„ქართული კოშმარის არაღიარების“ აქტი უზრუნველყოფს, რომ შეერთებულმა შტატებმა ეს არ გააკეთოს. ივანიშვილის რეჟიმი ყველა დემოკრატიული მთავრობის მიერ უნდა დარჩეს სრულად იზოლირებული მანამ, ვიდრე არ დათანხმდება თავისუფალ და სამართლიან არჩევნებს“, - უთხრა კონგრესმენმა კოენმა Fox News-ს.

კანონპროექტის მიხედვით, შეერთებულმა შტატებმა საქართველოს პრეზიდენტად და ერთადერთ ლეგიტიმურ ლიდერად სალომე ზურაბიშვილი უნდა აღიაროს. აშშ-ის ეს პოლიტიკა შეიძლება ბათილად გამოცხადდეს „საქართველოს კონსტიტუციის აღდგენის შემთხვევაში, რაც თავისუფალი და სამართლიანი არჩევნების ჩატარებით გამოიხატება“.

„ქართული კოშმარის არაღიარების აქტი“ წარმომადგენელთა პალატის საგარეო საქმეთა კომიტეტშია წარდგენილი.