აშშ საქართველოსთვის დახმარების $8 მილიონით შემცირებას გეგმავს

აშშ-ის დახმარების 8 მილიონით შემცირების შესახებ ჟურნალისტის შეკითხვას დღეს პრემიეერ-მინისტრმა ირაკლი კობახიძემ უპასუხა. მისი თქმით, ამ საკითხზე გადაწყვეტილებას შეერთებული შტატები იღებს.

„თქვენ იცით, რომ ამ დაფინანსების ძალიან დიდი ნაწილი არასამთავრობო ორგანიზაციებზე მიემართება. არასამთავრობო ორგანიზაციებმა იმედები გაუცრუეს ამერიკის სახელმწიფოს შარშან, შარშანწინ. შეიძლება ეს გახდა დაფინანსების შემცირების მიზეზი“, - განაცხადა კობახიძემ.

კონგრესში წარდგენილი დოკუმენტის მიხედვით, აშშ-ის დახმარება მხარს დაუჭერს საქართველოს დემოკრატიულ და ეკონომიკურ განვითარებას, ევროატლანტიკურ ინტეგრაციას და გააძლიერებს მის მედეგობას მავნე ზეგავლენის წინააღმდეგ.

დაფინანსება ასევე ხელს შეუწყობს: ინსტიტუციური კონტროლისა და ბალანსის გაძლიერებას და კანონის უზენაესობას; საქართველოს სამოქალაქო საზოგადოების ძალისხმევას დემოკრატიული და ეკონომიკური განვითარებისთვის; დამოუკიდებელ, სანდო და დაბალანსებულ მედიაზე ხელმისაწვდომობის გაუმჯობესებას; პოლიტიკური პლურალიზმს; შერიგების მცდელობებს, მათ შორის აფხაზეთსა და სამხრეთ ოსეთში; ენერგეტიკული უსაფრთხოების გაზრდას და სუფთა ენერგიის განვითარებას; ეკონომიკური განვითარებისა და დივერსიფიკაციის ხელშეწყობისთვის აუცილებელ რეფორმებს; დიჯიტალიზაციას, კიბერ უსაფრთხოების და მდგრადობის გაძლიერებას; კერძო სექტორის კონკურენტუნარიანობისა და სოფლის მეურნეობის პროდუქტიულობის გაფართოებას; უცხოური ინვესტიციების მოზიდვას.

ბიუჯეტის პროექტში ნათქვამია, რომ საზღვრების უსაფრთხოებისა და ანტიკორუფციული ინიციატივები გააძლიერებს ინსტიტუციურ შესაძლებლობებს, საჯარო ანგარიშვალდებულებას, შიდა კონტროლს, ზედამხედველობას და კეთილსინდისიერებას მთელ მთავრობაში.