ბიძინა ივანიშვილის დაწყევლის საბაბით თამარ გიორგაძე 3 ათასი ლარით დააჯარიმეს

სასამართლოს რეაგირებისთვის შინაგან საქმეთა სამინისტროში ახლად შექმნილმა სიძულვილის ენის წინააღმდეგ ბრძოლის სამმართველომ მიმართა. სასამართლო სხდომას თამარ გიორგაძე არ დაესწრო, მოსამართლის გადაწყვეტილებას ის სასამართლოს ეზოში ელოდებოდა.

შინაგან საქმეთა სამინისტროს და სასამართლოს პოზიციით, სოციალურ ქსელში პირადი სივრცე არ არსებობს. შსს-ს იურისტმა სალომე ქირიამ სხდომაზე განაცხადა, რომ „წყევლა არის სიტყვიერი შეურაცხყოფა და ვერ ჩაჯდება გამოხატვის თავისუფლების ფარგლებში“.

„ქალბატონი თამარის მიმართ ოქმი შედგა ადმინისტრაციულ სამართალდარღვევათა კოდექსის 166-ე მუხლის 1-ელი ნაწილის საფუძველზე. მისი ქმედება შეიცავდა როგორც წყევლას, ასევე უშუალოდ სიტყვიერ შეურაცხყოფას. ქალბატონი თამარის მხრიდან ადგილი ჰქონდა 166-ე მუხლის შემადგენლობას“, - განაცხადა შსს-ს იურისტმა.

166-ე მუხლი წვრილმან ხულიგნობას, საჯარო სივრცეში ლანძღვა-გინებასა და საზოგადოებრივი წესრიგის დარღვევას გულისხმობს, რაც ითვალისწინებს ჯარიმას 500-დან 3 000 ლარამდე ოდენობით, ან ადმინისტრაციულ პატიმრობას 20 დღემდე ვადით. განმეორების შემთხვევაში, ჯარიმა 3000-დან 5000 ლარამდე იზრდება, პატიმრობა კი 60 დღემდე. 

თამარ გიორგაძე წყევლას შეურაცხყოფად არ მიიჩნევს. „მე დავწერე პოსტი ჩემს პირად გვერდზე, სადაც შეურაცხყოფად მიიჩნიეს წყევლა. იმ დღეს ბევრი ისეთი ამბავი იყო, რაც გახდა ჩემი ამ პოსტის მაპროვოცირებელი. იმ დღეს დააპატიმრეს აფგან სადიგოვი ბაქოში, იმ დღეს იყო, რომ ევროპარლამენტი უვიზო მიმოსვლის შეჩერებას განიხილავდა, საპროცესო შეთანხმებას უფორმებდნენ 4 ოქტომბერს დაკავებულ უდანაშაულო ადამიანებს... ეს იყო ჩემი ემოციური რეაგირება“, – თამარ გიორგაძის თქმით, ის ჯარიმის გადახდას არ აპირებს, სასამართლოს გადაწყვეტილებას კი გაასაჩივრებს.

შინაგან საქმეთა სამინისტროს სიძულვილის ენის წინააღმდეგ ბრძოლის სამმართველო, რომელსაც „სქროლვა-სქრინვის სამმართველოდაც მოიხსენიებენ, 1-ელი ივნისიდან ამოქმედდა. სამმართველოს ინსპექტორები სოციალური ქსელების მონიტორინგს ახორციელებენ და მოქალაქეებს, პოლიტიკოსების, ჟურნალისტების თუ სხვა საჯარო პირების მიმართ დაწერილი პოსტებისა და კომენტარების გამო სამართალდარღვევის ოქმებს უდგენენ იმის მიუხედავად, რომ პოსტის ადრესატები თავს შეურაცხყოფილად არ მიიჩნევენ და უმეტეს შემთხვევაში არც იციან კონკრეტული პოსტების შესახებ.   

Facebook-ის მომხმარებლებს ადმინისტრაციულ სამართალდარღვევათა კოდექსის 166-ე მუხლის გარდა, 173¹⁶-ე მუხლითაც ედავებიან, რც სახელმწიფო-პოლიტიკური თანამდებობის პირის სიტყვიერ შეურაცხყოფას გულისხმობს და 1500-დან 4000 ლარამდე ჯარიმას ან 45-დღიან ადმინისტრაციულ პატიმრობას ითვალისწინებს.

ერთი თვის თავზე „ქართული ოცნების“ პარლამენტის თავმჯდომარემ, შალვა პაპუაშვილმა აღნიშნული სამმართველოს საქმიანობა დადებითად შეაფასა და ქვეყანაში სიძულვილის წყაროდ პროევროპული ძალები გამოაცხადა. მისი მტკიცებით, სიძულვილი და უხამსობა ქართველების თვალში „პროევროპულობასთან“ ასოცირდება, ხოლო ის ადამიანები, ვინც პროევროპულობას იბრალებენ, რეალურად სიძულვილისა და ლანძღვის მთავარი გამავრცელებლები არიან სოციალურ მედიასა და საჯარო სივრცეში.

„ევროკავშირს თუკი არ უნდა, კვლავ ასოცირებული იყოს უხამსობასთან, ლანძღვა-გინებასა და სიძულვილის ენასთან, ვფიქრობ, ევროკავშირიც გულშემატკივარი უნდა იყოს ამ წამოწყების, რაც, საბოლოო ჯამში, აიძულებს ე.წ. პროევროპულ ძალებს, დაუბრუნდნენ ზრდილობიან, უხამსობის გარეშე რიტორიკას და ამით გაგვაგებინონ, რა სურთ“, – განაცხადა პაპუაშვილმა.