„ბიძინა ყ*ეა?“ - ბანერებზე წარწერის გამო თბილისში 10 აქტივისტი დააკავეს

მის დაკავებას მალევე მოჰყვა სხვა მოქალაქეების პროტესტი. სოლიდარობის ნიშნად, საკრებულოსთან შეკრებილმა პირებმა ზუსტად იმავე შინაარსის წარწერიანი ფურცლები გაშალეს და სკანდირებდნენ: „სოლიდარობა თორნიკე თოშხუას“, „სოლიდარობა გიორგი ახობაძეს“, „სოლიდარობა ვახო სანაიას“, „თავისუფლება რეჟიმის ტყვეებს“, „დამხობა ბიძინას“.

პოლიციამ მათი დაკავებაც მალევე დაიწყო და ერთმანეთის მიყოლებით კიდევ 9 დემონსტრანტი აიყვანა. დაკავებულებს შორის არიან: ია მელითაური, ლაშა დგებუაძე, მარიამ მეყანწიშვილი, ვასო ბერიძე, სანდრო სეხნიაშვილი, მარინე ნანავა, შაკო ბაღდოშვილი, თორნიკე ტიკარაძე და ნატო ბოლქვაძე.

შემთხვევის ადგილიდან გავრცელებულ კადრებში პოლიციელის მხრიდან ფიზიკური ძალადობის ფაქტიც ჩანს. ერთ-ერთ ვიდეოში აღბეჭდილია, თუ როგორ არტყამს სახეში პოლიციის ერთ-ერთი ხელმძღვანელი პირი, დავით მამაგეიშვილი, სტუდენტ სანდრო სეხნიაშვილს დაკავების პროცესში.

შინაგან საქმეთა სამინისტროს განცხადებით, ყველა პირი დაკავებულია ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (პოლიციისადმი დაუმორჩილებლობა) მუხლებით. უწყება განმარტავს, რომ აქტივისტებს საჯარო სივრცეში შეურაცხმყოფელი ბანერები ეჭირათ, გამოთქვამდნენ შეურაცხმყოფელ ფრაზებს და არღვევდნენ საზოგადოებრივ წესრიგს.

ყველა დაკავებული თბილისისა და რეგიონების დროებითი მოთავსების იზოლატორებშია გადაყვანილი.

ახალგაზრდა იურისტთა ასოციაციის (საია) შეფასებით, გავრცელებულ კადრებში არ ჩანს დემონსტრანტების მხრიდან რაიმე სახის ძალადობრივი ქმედება ან წესრიგის დამრღვევი ისეთი ქცევა, რომელიც მათ დაკავებას ან მათზე ამგვარ ძალადობას გაამართლებდა.

საიას განცხადებით, დემონსტრანტისთვის პოლიციელის მხრიდან სახეში ხელის გარტყმა იმგვარი ქმედებაა, რაც არაადამიანური და დამამცირებელი მოპყრობის ზღვარს აღწევს.

„პოლიტიკური გამოხატვის გამო მშვიდობიანი დემონსტრანტების დაკავება უხეშად არღვევს მათი შეკრებისა და გამოხატვის თავისუფლებას: იმ შემთხვევაშიც კი, როდესაც გამოხატვა ვულგარულია და კონკრეტულ პირს [ამ შემთხვევაში, ბიძინა ივანიშვილს] მიემართება, სახელმწიფო ვალდებულია გაითვალისწინოს გამოხატვის კონტექსტი და როლი საჯარო დისკუსიაში. პოლიტიკოსებსა და სახელმწიფო დაწესებულებების წარმომადგენლებს მათ მიმართ გამოთქმული კრიტიკის მიმართ თმენის გაცილებით მაღალი ვალდებულება აქვთ, ვიდრე სხვა ნებისმიერ მოქალაქეს. ეს მსჯელობა პოლიტიკური ფიგურების მიღმა ვრცელდება საჯარო პირებზეც, რომლებიც თავიანთი ქმედებებით ან თანამდებობით საზოგადოებრივ ასპარეზზე არიან“, - საია მიიჩნევს, რომ აქციების ამგვარი ფორმით დაშლა არა მხოლოდ უკანონობა, არამედ სისხლის სამართლის კოდექსით გათვალისწინებული დანაშაულია - შეკრების ან მანიფესტაციის მოწყობის ანდა მასში მონაწილეობის უფლების განხორციელებისათვის უკანონოდ ხელის შეშლა (სსკ მუხლი 161)".