ბიგვავა: აფხაზეთში რუსეთის სამხედრო ყოფნა პასუხია საქართველოს NATO-სთან დაახლოებაზე

„რუსეთის ფედერაცია წარმოადგენს აფხაზეთის უსაფრთხოების გარანტს სახელმწიფოთაშორისი ხელშეკრულებების საფუძველზე, რაც საერთაშორისო სამართალთან შესაბამისობაშია. რუსეთის სამხედრო ყოფნა აფხაზეთში არის პასუხი საქართველოს აგრესიულ პოლიტიკასა და ნატო-სთან დაახლოებაზე“, - განაცხადა ე.წ. საგარეო საქმეთა მინისტრის მოადგილემ.

ოდისეი ბიგვავამ კომენტარი გააკეთა ატომური ენერგიის საერთაშორისო სააგენტოს 69-ე გენერალურ კონფერენციაზე საქართველოს საგარეო საქმეთა მინისტრის მოადგილის, ლაშა დარსალიას განცხადებაზე, რომლის მიხედვითაც, რუსეთის მიერ ოკუპირებულ აფხაზეთსა და ცხინვალის რეგიონში არსებული ვითარება ბირთვული უსაფრთხოებისთვის მნიშვნელოვანი გამოწვევაა. ბიგვავას თქმით, დარსალიას განცხადებები „შეთხზული“ და „არასწორია“.

„ასეთი განცხადებები დაუსაბუთებელია და წარმოადგენს საინფორმაციო კამპანიის ნაწილს, რომელიც მიზნად ისახავს აფხაზეთისა და რუსეთის დისკრედიტაციას“, - აღნიშნა მან.

ბიგვავას თქმით, აფხაზეთი „უკიდურესად დაინტერესებულია“ სამხრეთ კავკასიის რეგიონის სტაბილურობით და მზადაა „საერთაშორისო თანამშრომლობისთვის, მაგრამ მხოლოდ მისი სუვერენიტეტის აღიარების შემდეგ“.

„აფხაზეთი ყოველთვის მზადაა საქართველოსთან კონსტრუქციული დიალოგისთვის, მაგრამ მხოლოდ ურთიერთაღიარებისა და თანასწორობის საფუძველზე. კავკასიაში მშვიდობა შეუძლებელია აფხაზეთს, სამხრეთ ოსეთსა და საქართველოს შორის, რუსეთის შუამავლობით, პირდაპირი მოლაპარაკებების გარეშე და აფხაზეთის, სამხრეთ ოსეთისა და რუსეთის ინტერესების გათვალისწინების გარეშე“, - განაცხადა ოდისეი ბიგვავამ.

„ქართული ოცნების“ ხელისუფლება ამ განცხადებებს არ გამოხმაურებია.