გაგლოევმა „ძალოვნებს“ დაავალა 4 ოქტომბრის არჩევნების წინ ე.წ. საზღვარზე სიტუაცია გააკონტროლონ

გაგლოევმა ხაზი გაუსვა „აგრესიული უმცირესობების მხრიდან შესაძლო პროვოკაციებზე სწრაფი რეაგირების აუცილებლობას“.

„იგივე ძალები, რომლებიც 2008 წელს ხელისუფლებაში იყვნენ და დღეს ოპოზიციაში არიან, მუდმივად ცდილობენ რაღაც პროვოკაციების მოწყობას, მათ შორის საზღვარზე. ამიტომ, მოდუნება არ შეიძლება და სახელმწიფო უსაფრთხოების კომიტეტმა, სასაზღვრო სამსახურმა, თავდაცვის სამინისტრომ და მთელმა ძალოვანმა ბლოკმა ოპერატიულად უნდა აკონტროლონ სიტუაცია, რათა არ დაუშვან არანაირი პროვოკაცია“, – განაცხადა ე.წ. სამხრეთ ოსეთის პრეზიდენტმა.

4 ოქტომბერს, მოქალაქეები და ოპოზიციური პარტიები, რომლებიც ადგილობრივი თვითმმართველობის არჩევნებს ბოიკოტს უცხადებენ, თბილისში საპროტესტო აქციის გამართვას აპირებენ. აქციის ორგანიზატორთა ნაწილი ამბობს, რომ ეს იქნება მშვიდობიანი რევოლუცია, რის შედეგადაც „ქართული ოცნების“ ხელისუფლებას გადადგომა და ვადამდელი საპარლამენტო არჩევნების დანიშვნა მოუწევს.