გელა გელაძე ჩინეთში ბელარუსის საგამოძიებო კომიტეტის თავმჯდომარეს შეხვდა

ქალაქ ლიანიუნგანგში გამართული სამუშაო შეხვედრის შესახებ ინფორმაცია ბელარუსის საგამოძიებო კომიტეტმა გაავრცელა. უწყების თანახმად, მოლაპარაკებების დროს მხარეებმა განიხილეს სისხლის სამართლის საქმეებში იურიდიული დახმარების გაწევის საკითხები, შემდგომი თანამშრომლობის შესაძლო სფეროები, საგამოძიებო პროცესების დიგიტალიზაცია, თანამედროვე ანალიტიკური ინსტრუმენტების დანერგვა და პერსონალის განვითარება.

საქართველოს შინაგან საქმეთა სამინისტროს გელა გელაძისა და დმიტრი ჰარას შეხვედრის შესახებ ინფორმაცია ამ დრომდე არ გამოუქვეყნებია. სამინისტროს ვებ-გვერდზე ვკითხულობთ, რომ გელაძემ შეხვედრები გამართა ყაზახეთის შინაგან საქმეთა მინისტრ ერჟან სადენოვთან და ჩინეთის საზოგადოებრივი უსაფრთხოების მინისტრ ვანგ სიაოხუნგთან.

„ქართული ოცნების“ პრემიერ-მინისტრმა, ირაკლი კობახიძემ ჟურნალისტის შეკითხვაზე, რატომ არ გამოაქვეყნა შსს-მ ბელარუსის საგამოძიებო კომიტეტის ხელმძღვანელთან შეხვედრაზე ინფორმაცია, თქვა, რომ „აქ დასამალი არაფერია“.

„პირიქით, აბსოლუტურად ღიად გაცხადებული ვიზიტია, ის იმყოფება ჩინეთში. ჩვენთვის განსაკუთრებული პრიორიტეტია ჩინეთთან როგორც პოლიტიკური, ისე ეკონომიკური კუთხით თანამშრომლობის გაღრმავება. ამ კუთხით ძალიან მნიშვნელოვანია, რომ შინაგან საქმეთა მინისტრი იმყოფება ჩინეთში. მნიშვნელოვანი ვიზიტია და ჩვენ დიდი ინტერესით ველოდებით ამ ვიზიტის შედეგებს“, – განაცხადა კობახიძემ.

გელა გელაძე ლიანიუნგანგში, დელეგაციასთან ერთად, ჩინეთის საზოგადოებრივი უსაფრთხოების მინისტრის მიწვევით იმყოფება და „გლობალური საზოგადოებრივი უსაფრთხოების თანამშრომლობის ფორუმში“ მონაწილეობს.