ნორვეგიაში დაფუძნებული ადამიანის უფლებათა დამცველი ორგანიზაცია Hengaw-ს განცხადებით, ირანში ანტისამთავრობო საპროტესტო აქციების მონაწილის, 26 წლის ერფან სოლთანის სიკვდილით დასჯა არსებული შეშფოთების გამო გადაიდო.
ახალი ამბები
მკითხველის რჩეული
- 1 6 წელზე მეტი ასაკის ავტომობილების იმპორტი 1-ელი აპრილიდან აიკრძალება
- 2 „სფერო ჰოლდინგის“ საქმეზე კიდევ ერთი პირი, სოფიკო პეტრიაშვილი დააკავეს
- 3 18 წლის ბიჭის მკვლელობისთვის ივანე გიგლემიანს უვადო პატიმრობა მიუსაჯეს
- 4 ტელეკომპანია „იმედი“ 1000 ლარად კომპანია „პრაიმ მედია გლობალმა“ იყიდა
- 5 მოზარდზე ძალადობისთვის გლდანი-ნაძალადევის პოლიციის უფროსის მოადგილე დააკავეს
- 6 ირანის უზენაესი ლიდერის, აიათოლა ალი ხამენეის სიკვდილი დადასტურდა
„ერფან სოლთანის ნათესავებისგან მიღებული ინფორმაციის თანახმად, სიკვდილით დასჯის ბრძანება, რომლის შესახებაც ადრე ეცნობა მის ოჯახს და რომლის აღსრულებაც ოთხშაბათს იყო დაგეგმილი, არ აღსრულდა და გადაიდო“, - ნათქვამია ორგანიზაციის მიერ გავრცელებულ განცხადებაში.
ირანის სახელმწიფო მედიის ცნობით, სასამართლომ უარყო ინფორმაცია, რომ ერფან სოლთანის სიკვდილით დასჯა ჰქონდა მისჯილი. სასამართლოს განცხადებით, მას „ქვეყნის შიდა უსაფრთხოების წინააღმდეგ შეთქმულებასა“ და რეჟიმის წინააღმდეგ „პროპაგანდისტულ საქმიანობას“ ედავებიან, რაზეც, ირანის კანონმდებლობის თანახმად, სიკვდილით დასჯა არ ვრცელდება.
სასამართლომ ასევე განაცხადა, რომ თუ პროკურორები ბრალდებებს დაადასტურებენ და სასამართლო კანონიერ გადაწყვეტილებას გამოიტანს, კანონით გათვალისწინებული სასჯელი თავისუფლების აღკვეთა იქნება.
ტანსაცმლის მაღაზიის მფლობელი ერფან სოლთანი 8 იანვარს, საპროტესტო აქციებში მონაწილეობის შემდეგ დააკავეს. სამი დღის განმავლობაში ოჯახს მისი ადგილსამყოფელის შესახებ არანაირი ინფორმაცია არ ჰქონდა.
მოგვიანებით ცნობილი გახდა, რომ ახალგაზრდა მამაკაცი კარაჯში, ღეზელ ჰესარის ციხეში იყო მოთავსებული. BBC Persian-თან საუბრისას ნათესავმა განაცხადა, რომ ოჯახს უთხრეს, რომ მისი სიკვდილით დასჯა 14 იანვარს იყო დაგეგმილი.
გავრცელებული ინფორმაციით, ერფან სოლთანის „ღმერთის წინააღმდეგ ომის“ ბრალდება წარუდგინეს, რაც ისლამური რესპუბლიკის სისხლის სამართლის კოდექსის თანახმად, სიკვდილით დასჯას ითვალისწინებს.
ახალგაზრდა მამაკაცის ამბავმა მთელი მსოფლიოს ყურადღება მიიპყრო. ადამიანის უფლებათა დამცველი ჯგუფები აცხადებენ, რომ სოლთანი შესაძლოა ყოფილიყო პირველი მომიტინგე, რომელსაც ირანის რეჟიმის წინააღმდეგ მიმდინარე დემონსტრაციების ფარგლებში სიკვდილით დასჯიდნენ.
14 იანვარს ირანის საგარეო საქმეთა მინისტრმა, აბას არაღჩიმ ამერიკული ტელეკომპანია Fox TV-თან ინტერვიუში განაცხადა, რომ ხელისუფლებას აქციის მონაწილეთა ჩამოხრჩობის გეგმა არ აქვს.
