ია ანთაძის თქმით, საზოგადოებრივ მაუწყებელზე მისი პროექტი „საინტერესო ადამიანები“ დახურეს

„გუშინ დასრულდა ჩემი თანამშრომლობა საქართველოს პირველ არხთან - დახურეს პროექტი „საინტერესო ადამიანები“, რომელმაც ბოლო წლებში ბევრი სიხარული მომიტანა.

რა თქმა უნდა, ეს გადაწყვეტილება მოულოდნელი არ ყოფილა, რადგან მას ჩემი არჩევანის, ჩემი პასუხისმგებლობის ბუნებრივ შედეგად აღვიქვამ.

უზომოდ მადლობელი ვარ იმ 302 ადამიანის, ვინც ინტერვიუზე დამთანხმდა და ვისთან ერთადაც თანამედროვე საქართველოს ძალიან დასამახსოვრებელი სურათი შევქმენით. ასევე, მადლობელი ვარ ყველა მკითხველის - თქვენ აცოცხლეთ ეს პროექტი 7.5 წლის განმავლობაში“, - წერს ჟურნალისტი.

პროექტ „საინტერესო ადამიანების“ ფარგლებში, „პირველი არხის“ ვებ-გვერდზე, კვირაში ერთხელ, პორტრეტის ჟანრის ინტერვიუ ქვეყნდებოდა. ბოლო პერიოდში, ია ანთაძის რესპონდენტებს შორის იყვნენ ჟურნალისტი, გამოცემა „პუბლიკის“ დამფუძნებელი ზურა ვარდიაშვილი, „ახალგაზრდა იურისტთა ასოციაციის“ თავმჯდომარე ნონა ქურდოვანიძე, ყოფილი საჯარო მოხელე, დავით ჩხეიძე და პროევროპულ აქციებში ჩართული არაერთი ადამიანი.

„აქამდე ხელშეკრულებით მქონდა შეზღუდული საზოგადოებრივი აქტიურობა და პირობას პატიოსნად ვიცავი. ახლა სრულიად თავისუფალი ვარ და შევეცდები, გზადაგზა ყველა მოსაზრება გაგიზიაროთ, რასაც მნიშვნელოვნად ჩავთვლი“, - წერს ია ანთაძე სოციალურ ქსელში.

ია ანთაძე საზოგადოებრივი მაუწყებლის თანამშრომელი 2017 წელს გახდა, მას შემდეგ, რაც არხის დირექტორის თანამდებობა ვასილ მაღლაფერიძემ დაიკავა. მანამდე, ის ტელეკომპანია GDS-ში გადაცემა „59“ წამის პროდიუსერი იყო და წლების განმავლობაში ჟურნალისტად მუშაობდა „რადიო თავისუფლებაში“.