იოსელიანი: ძალიან ბევრი ამბობს, რომ დაკავებისას დაკარგეს ნივთები, განსაკუთრებით ტელეფონი

„სამწუხაროდ, ამ ადამიანების ნაწილი მიუთითებს ისევ ფიზიკურ დაზიანებებზე, პოლიციელების მიერ უფლაბამოსილების გადამეტებაზე, რამდენიმეს აღენიშნება სახეზე სისხლნაჟღენთები.

ძალიან ბევრი დაკავებული მიუთითებს პირადი ნივთების დაკარგვაზე, განსაკუთრებით ტელეფონის, რომელიც მათ ჩამოართვეს დაკავების დროს - არ ვიცი, კრიმინალურმა პოლიციამ თუ სპეცრაზმმა - და მერე ეს ნივთები არის გამქრალი. საგანგაშოდ ბევრი ადამიანი ამბობს, რომ ისინი კარგავენ პირად ნივთებს“, - განაცხადა ლევან იოსელიანმა.

მან შინაგან საქმეთა სამინისტროს მოუწოდა, ყურადღება მიაქციოს პირადი ნივთების, განსაკუთრებით კი ტელეფონების ჩამორთმევის ფაქტს.

„ყველა პირადი ნივთი, ყველა ტელეფონი, რომელიც ჩამოერთვათ პროტესტის მონაწილეებს, აუცილებლად უნდა დაუბრუნდეთ. ეს მათი საკუთრებაა და არავის აქვს უფლება ჩამოართვან კანონის გარეშე“, - აღნიშნა სახალხო დამცველმა.

6-7 დეკემბერს თბილისში, რუსთაველის გამზირზე გამართულ საპროტესტო აქციაზე, ადმინისტრაციული წესით, 48 პირი დააკავეს. შინაგან საქმეთა სამინისტრო მათ პოლიციელის მოთხოვნისადმი დაუმორჩილებლობასა და წვრილმან ხულიგნობას ედავება.

საპოლიციო ძალებმა მშვიდობიანი დემონსტრანტები აქციის მეცხრე ღამესაც დაარბიეს. სპეცრაზმელები მათ დასდევდნენ და ძალის გამოყენებით აკავებდნენ. წუხელ დაკავებულთა შორის არიან ტელეკომპანია „მთავარი არხის“ ჟურნალისტი ბექა ყორშია, ეკონომიკის მინისტრის ყოფილი პირველი მოადგილე ნიკოლოზ ალავიძე და მისი შვილი ვაკო ალავიძე.