2020 წლის მარტის შემდეგ, მსოფლიოში Covid-19-ით გარდაცვალების ყველაზე ნაკლები შემთხვევა გასულ კვირაში დაფიქსირდა. ჯანდაცვის მსოფლიო ორგანიზაციის (WHO) გენერალური დირექტორი ტედროს ადანომ გებრეისუსი ამბობს, რომ პანდემიის დასასრული ჩანს.
ახალი ამბები
მკითხველის რჩეული
- 1 მზია ამაღლობელის მხარდამჭერი აქციის გამო შსს-მ 9 ადამიანს სამართალდარღვევის ოქმი შეუდგინა
- 2 მოსკოვი მზადაა, რუსეთ-საქართველოს „ურთიერთობების ნორმალიზაცია“ გააგრძელოს
- 3 გომელაური, „ხარება“ და სხვა დასანქცირებული პოლიციელები ღირსების ორდენით დააჯილდოვეს
- 4 პატიმრის ადვოკატი: „სახის არცერთი ძვალი მთელი არ აქვს, ეს აღწერილი არაა და რატომ, გაუგებარია“
- 5 პოლიციის აკადემიის რექტორად სავარაუდო კორუფციაში მხილებული ლელა ჩიქოვანი დაინიშნა
- 6 თბილისის მერია „რიყის დოქებთან“ 16 წლის ბიჭის დაღუპვაზე პასუხისმგებლობას ირიდებს
WHO-ს ვებგვერდზე გამოქვეყნებული მონაცემების მიხედვით, გასულ შვიდ დღეში, მსოფლიოში კორონავირუსის 3 188 184 ახალი შემთხვევა აღირიცხა, 10 085 ინფიცირებული გარდაიცვალა.
„არასდროს ვყოფილვართ უკეთეს მდგომარეობაში პანდემიის დასასრულებლად. ჯერ იქ არ ვართ, მაგრამ დასასრული ჩანს. მარათონის მორბენალი არ ჩერდება, როდესაც ფინიშის ხაზი ჩნდება. ის უფრო ძლიერად, მთელი დარჩენილი ენერგიით გარბის - ასე უნდა მოვიქცეთ ჩვენც. ჩვენ ვხედავთ ფინიშის ხაზს, ვიგებთ, მაგრამ ახლა ყველაზე ცუდი დროა გაჩერებისთვის. ახლა დროა, ვირბინოთ უფრო ძლიერად და დავრწმუნდეთ, რომ ხაზს გადავლახავთ და ჩვენი მძიმე შრომისთვის ჯილდოს მივიღებთ. თუ ჩვენ ამ შესაძლებლობას ახლა არ გამოვიყენებთ, არსებობს რისკი მივიღოთ უფრო მეტი ვარიანტი, მეტი სიკვდილი, მეტი ზიანი და გაურკვევლობა“, - განაცხადა გებრეისუსმა.
ჯანმრთელობის მსოფლიო ორგანიზაციამ ექვსი პოლიტიკის კრებული გამოაქვეყნა, სადაც მოცემულია ინფორმაციას იმ ძირითადი ღონისძიებების შესახებ, რომლებიც მთავრობებმა უნდა გაატარონ. დოკუმენტები მოიცავს ინსტრუქციას ტესტირების, ვაქცინაციის, დაავადების მართვის საუკეთესო პრაქტიკის, ჯანდაცვის დაწესებულებებში ინფექციის კონტროლის ზომების, დეზინფორმაციის გავრცელების პრევენციისა და საზოგადოების ჩართულობის შესახებ. WHO სახელმწიფოებს მოუწოდებს, ინვესტირება მოახდინონ რისკ-ჯგუფების, მათ შორის, ჯანდაცვის სფეროში დასაქმებულებისა და ხანდაზმულების 100%-ით ვაქცინირებაში.
საქართველოს ჯანდაცვის სამინისტრო სექტემბრიდან კოვიდსტატისტიკას არა ყოველკვირეულად, არამედ თვეში ერთხელ გამოაქვეყნებს. 28 აგვისტოდან 2 სექტემბრის კვირაში, ქვეყანაში COVID-19-ის 12 787 ახალი შემთხვევა გამოვლინდა, კორონავირუსით გარდაიცვალა 8 ადამიანი.
2020 წლის 26 თებერვლიდან 2022 წლის 2 სექტემბრამდე პერიოდში, საქართველოში ვირუსი 1 762 206 ადამიანს დაუდასტურდა. მათგან 16 900 გარდაიცვალა, 1 733 459 კი გამოჯანმრთელდა. კორონავირუსზე სრულად (ორი დოზით) აცრილია 1 276 173 მოქალაქე. სრულად აცრილთა ყველაზე დიდი ნაწილის - 649 598 ადამიანის ასაკი 18-დან 49 წლამდეა.
