„ქართული ოცნების“ წევრმა, ლუკა ძაძამიამ თბილისის საკრებულო დატოვა

ლუკა ძაძამია Facebook-ის პირად გვერდზე 18 ნოემბრამდე აქტიურად აზიარებდა საკრებულოს სიახლეებს. ვრცელდება ინფორმაცია, რომ ის თანამდებობიდან გაუშვეს.

„ეს მისი პირადი გადაწყვეტილებაა. ამ ახალგაზრდა ადამიანმა უამრავი შეურაცხყოფა მიიღო ბოლო თვეებში. ის აპირებს, მუშაობა კერძო სექტორში განაგრძოს. ის „ქართული ოცნების“ მხარდამჭერია. გუშინ გვქონდა საუბარი. დარწმუნებული ვარ, თავად გააკეთებს განმარტებას“, - უთხრა კახა კალაძემ ჟურნალისტებს.

ლუკა ძაძამია, რომელიც წარსულში ანტისამთავრობო აქციების მონაწილე იყო, 2025 წლის ადგილობრივი თვითმმართველობის არჩევნებისთვის კახა კალაძემ თბილისის საკრებულოს წევრობის კანდიდატად წარადგინა. ძაძამია „ქართული ოცნების“ სიის პირველ ოცეულში მოხვდა.

„ლუკა ძაძამია არის ახალგაზრდა ადამიანი. ყველას გვეშლება ცხოვრებაში, შეუცდომელი არავინაა, მითუმეტეს როცა ხარ ახალგაზრდა. მან გააკეთა განმარტებები ამასთან დაკავშირებით, რომ დაუშვა შეცდომა. ყველას მოგვდის, შეუცდომელი არავინაა. შესაბამისად, ახსნა-განმარტებები გაკეთებული იყო მის ქმედებებთან დაკავშირებით, მის აწმყოსთან დაკავშირებით, მომავალთან დაკავშირებით თვითონ გააკეთებს. არანაირი პრეტენზია არ ყოფილია „ოცნების“ მხარდამჭერებისგან“, - თქვა კალაძემ.

ლუკა ძაძამია საკრებულოს წევრი სამი კვირა იყო. 20 ნოემბერს ტელეკომპანია „პირველმა“ გაავრცელა ძაძამიას განცხადება თანამდებობის დატოვების შესახებ. ის წერს, რომ ტოვებს „მე-8 მოწვევის საკრებულოს შემადგენლობას სხვა სამსახურში საქმიანობის გაგრძელების მიზნით“.