უკრაინის დედაქალაქზე რუსეთის მასირებული შეტევის შედეგად დაღუპულთა რიცხვი 18-მდე გაიზარდა. ცნობილია, რომ დაღუპულებს შორის ოთხი ბავშვია. დარნიცკის რაიონში სამაშველო-საძიებო ოპერაცია გრძელდება და არ არის გამორიცხული მსხვერპლის რაოდენობა კიდევ გაიზაროდს. 29 აგვისტო უკრაინაში გლოვის დღედ გამოცხადდა.
ახალი ამბები
მკითხველის რჩეული
- 1 სტრასბურგის სასამართლომ გელა მთივლიშვილის საქმის არსებითი განხილვა დაიწყო
- 2 სუს-მა ძებნა გამოაცხადა ლილუაშვილის ნათესავსა და ვანში „ოცნების“ დეპუტატზე, ბიჭიკო პაიკიძეზე
- 3 გაგლოევმა „ძალოვნებს“ დაავალა 4 ოქტომბრის არჩევნების წინ ე.წ. საზღვარზე სიტუაცია გააკონტროლონ
- 4 გლდანის ციხის ყოფილი დირექტორი დავით გოგობერიშვილი გარდაცვლილი იპოვეს
- 5 ხაზარაძე და გახარია: ჩვენს პარტიებს შორის ურთიერთთანამშრომლობის მემორანდუმი შედგა
- 6 კობახიძე: სასურველი არ არის, მოსწავლემ პირველივე კურსიდან უცხოეთში განაგრძოს სწავლა
კიევის სამხედრო ადმინისტრაციის ხელმძღვანელმა, ტიმურ ტკაჩენკომ განაცხადა, რომ რუსეთის შეიარაღებულმა ძალებმა 28 აგვისტოს ღამეს, დედაქალაქს „შაჰიდის“ ტიპის დრონებითა და სხვადასხვა ტიპის რაკეტით შეუტიეს. რუსული რაკეტა მოხვდა დარნიცკის რაიონში მდებარე ერთ-ერთ ხუთსართულიან საცხოვრებელ შენობას.
უკრაინის ხელისუფლების ბოლო ინფორმაციით, მასშტაბური დარტყმის შედეგად, სულ მცირე 18 ადამიანი დაიღუპა, 38 კი ადამიანი დაშავდა. ოთხი დაღუპული ბავშვიდან ერთ-ერთი 2 წლის ასაკისაა.
კიევში დაზიანდა ევროკავშირის დიპლომატიური მისიის შენობაც. ევროკომისიის პრეზიდენტმა, ურსულა ფონ დერ ლაიენმა განაცხადა, რომ შენობიდან 50 მეტრში, 20 წამის განმავლობაში, ორი რაკეტა აფეთქდა. მან დარტყმას ევროკავშირის „დელეგაციაზე თავდასხმა“ უწოდა და დაადასტურა, რომ დიპლომატიური მისიის არცერთი წევრი არ დაშავებულა.
„ეს კიდევ ერთი საშინელი შეხსენებაა იმისა, თუ რა დევს სასწორზე. ეს აჩვენებს, რომ კრემლი არაფრის წინაშე არ გაჩერდება უკრაინის წინააღმდეგ ტერორში, ბრმად კლავს მშვიდობიან მოსახლეობას: კაცებს, ქალებსა და ბავშვებს და მიზანში იღებს ევროკავშირსაც კი“, - თქვა ფონ დერ ლაიენმა.
კომენტარი გააკეთა საფრანგეთის პრეზიდენტმაც. ემანუელ მაკრონის განცხადებით, საფრანგეთი უმკაცრესად გმობს ამ უაზრო და სასტიკ თავდასხმებს.
„629 რაკეტა და დრონი ერთ ღამეში უკრაინის თავზე: ასე გამოიყურება მშვიდობა რუსეთის წარმოსახვაში.
ტერორი და ბარბაროსობა. ათზე მეტი ადამიანი დაიღუპა, მათ შორის ბავშვები. განზრახ დაბომბეს საცხოვრებელი ადგილები და სამოქალაქო ინფრასტრუქტურა. დაზიანდა ევროკავშირის წარმომადგენლობისა და ბრიტანეთის საბჭოს ოფისები“, - დაწერა მაკრონმა სოციალურ ქსელ X-ში.
„პუტინი ბავშვებსა და მშვიდობიან მოსახლეობას კლავს და მშვიდობის იმედებს ძირს უთხრის. ეს სისხლისღვრა უნდა დასრულდეს“, - განაცხადა დიდი ბრიტანეთის პრემიერ-მინისტრმა კირ სტარმერმა. მან დაადასტურა, რომ საჰაერო დარტყმების შედეგად ბრიტანეთის საბჭოს შენობაც დაზიანდა.
მომხდართან დაკავშირებით დიდი ბრიტანეთის საგარეო საქმეთა სამინისტროში რუსეთის ელჩი ანდრეი კელინი დაიბარეს.
რუსეთის თავდაცვის სამინისტრომ განაცხადა, რომ რუსეთის შეიარაღებულმა ძალებმა 28 აგვისტოს ღამეს იერიში სამხედრო-სამრეწველო კომპლექსის საწარმოებსა და სამხედრო საჰაერო ბაზებზე მიიტანეს.
