ლავროვი ცხინვალს და სოხუმს უსაფრთხოების საკითხებში დახმარებას დაჰპირდა

„სამხრეთ ოსეთი რუსეთის ახლო მეგობარი და მოკავშირეა. ჩვენ გავაგრძელებთ მის დახმარებას უსაფრთხოების, სტაბილურობისა და მდგრადი განვითარების უზრუნველყოფაში.

ჩვენი შეფასებით, განსაკუთრებული მნიშვნელობა აქვს სამხრეთ ოსეთის საერთაშორისო პოზიციების განმტკიცებას, საერთაშორისო საზოგადოებამდე 2008 წლის მოვლენების შესახებ სიმართლის და საგარეო კონტაქტების კუთხით თანამედროვე სამხრეთ ოსეთის შესაძლებლობების მიტანას“, - განაცხადა ლავროვმა ოკუპირებული ცხინვალის ე.წ. საგარეო საქმეთა მინისტრ ახსარ ჯიოევთან შეხვედრისას.

სერგეი ლავროვის თქმით, დღეს „სამხრეთ ოსეთი“ წარმატებით ვითარდება, როგორც დემოკრატიული, სუვერენული სახელმწიფო, აშენებს თანამედროვე ეკონომიკასა და სოციალურ სექტორს, ზრდის საგარეო ვაჭრობას და მნიშვნელოვან ინფრასტრუქტურულ პროექტებს ახროციელებს.

ლავროვი განვითარებასა და უსაფრთხოებაში დახმარებას დაჰპირდა ოკუპირებული აფხაზეთის ე.წ. საგარეო საქმეთა მინისტრ ოლეგ ბარციცსაც.

„ჩვენი მხრიდან, გავაგრძელებთ სუვერენული, დამოუკიდებელი აფხაზეთის განვითარებისა და უსაფრთხოების საკითხებში კომპლექსური დახმარების გაწევას. ეს სრულად შეესაბამება ჩვენი ხალხების ინტერესებს“, - აღნიშნა ლავროვმა.

რუსეთის ხელისუფლება მოელის, რომ აფხაზეთში ტურიზმის ზრდასთან ერთად, გაგრძელდება კერძო ინვესტიციებისთვის ხელსაყრელი პირობების შექმნა.