მაშველებმა შოვში სტიქიის შედეგად დაღუპული 27-ე ადამიანის ცხედარი იპოვეს

„ეს არ არის მცირეწლოვანი, არის ზრდასრული, სავარაუდოდ, მამაკაცი. გადასვენებულია პროზექტურაში. ამ ეტაპზე, მდინარის კალაპოტში მძიმე ტექნიკით მაქსიმალური მუშაობა მიდის. გუშინ ნიადაგმა მოგვცა მუშაობის საშუალება გარკვეულ ლოკაციებზე. თუმცა, დაახლოებით 2 მეტრის სიღრმის ქვემოთ უკვე წყალი შეინიშნება და ვფიქრობთ, რომ სიღრმე სადაც შეიძლება ვეძებოთ, 1.5-2 მეტრია. უშუალოდ მდინარის კალაპოტზე არ არის საუბარი. საუბარია კალაპოტის მშრალ მონაკვეთებზე. ამბროლაურამდე გვაქვს განაწილებული სექტორები, რაც 18 სექტორს მოიცავს“, - განაცხადა ჟურნალისტებთან მღებრიშვილმა.

ორი კვირის წინ შოვში მომხდარი სტიქიის შედეგად დაღუპულთა რაოდენობა 27-მდე გაიზარდა. ამ დროისთვის იდენტიფიცირებულია 24 ცხედარი. 6 დაკარგულის ისევ ეძებენ.

სამძებრო სამუშაოები სტიქიის ეპიცენტრში, ასევე, მდინარეების - რიონის და ჭანჭახის კალაპოტში, 54 კილომეტრიან მონაკვეთში მიმდინარეობს. სამუშაოებში ჩართულია, როგორც ცოცხალი ძალა, ასევე, მძიმე ტექნიკა, კინოლოგთა ჯგუფი და მცურავი საშუალებები. 

3 აგვისტოს, რაჭაში, ბუბას მთიდან მოვარდნილმა ღვარცოფმა კურორტი შოვი თითქმის მთლიანად გაანადგურა. სამაშველო ოპერაცია 3 საათის დაგვიანებით დაიწყო, დაღამებისთანავე კი მფრინავებმა ოპერაციაში მონაწილეობა შეწყვიტეს იმ მიზეზით, რომ ვერტმფრენს ღამით უსაფრთხოდ ფრენა არ შეეძლო. 3-4 აგვისტოს სტიქიის ზონიდან 210 ადამიანი გამოიყვანეს.

ხელისუფლების წარმომადგენლები აცხადებენ, რომ მომხდარის თავიდან აცილება შეუძლებელი იყო, რასაც დამოუკიდებელი ექსპერტები არ ეთანხმებიან.