მხარს ვუჭერთ საქართველოს ნაბიჯებს საკუთარი სუვერენიტეტის დასაცავად - ლუკაშენკო

„საქართველოში თქვენ უნდა გააკეთოთ, როგორც ამას აკეთებთ კიდეც, ყველაფერი, რაც ქართველი ხალხის ინტერესებშია. ბელარუსებსა და ქართველებს შორის მეგობრობისა და ურთიერთპატივისცემის ტრადიციები და ისტორიის საერთო ფურცლები მყარი საფუძველია ჩვენს ქვეყნებს შორის სრულფასოვანი ყოვლისმომცველი თანამშრომლობის აღდგენისთვის. კარგად იცით, რომ ჩვენი კარი თქვენთვის ყოველთვის იყო და რჩება ღია“, - თქვა ლუკაშენკომ, რომელიც 2022 წელს აფხაზეთში იმყოფებოდა, ხოლო 2023 წელს მინსკში მიიღო საქართველოს ოკუპირებული რეგიონის მაშინდელი ე.წ. პრეზიდენტი ასლან ბჟანია.

გიორგი საგანელიძე ამბობს, რომ ელჩის მისიის შესრულებას „საუკეთესო განწყობით იწყებს“ და ორმხრივი თანამშრომლობის პერსპექტივებს ოპტიმისტურად უყურებს.

„არსებობს ურთიერთგაგება, რომ ჩვენი ხალხები, რომლებსაც ერთმანეთის მიმართ ძალიან პოზიტიური დამოკიდებულება აქვთ, უნდა დავაახლოოთ, თანამშრომლობა განვავითაროთ. ჩვენ გვესმის, რომ მარტივი დრო არაა. შესაბამისად, უნდა ვიპოვოთ საერთო ენა და განვავითაროთ ჩვენი ორმხრივი ურთიერთობები იმ მიმართულებებით, რომლებიც ორივე მხარისთვის სასარგებლოა. [...] მთავარია, რომ ჩვენს ქვეყნებში, ჩვენს რეგიონებში მშვიდობა იყოს“, - აღნიშნა დიპლომატმა.

კითხვაზე, ხედავს თუ არა საქართველო ბელორუსის მხრიდან უფრო მჭიდრო დიალოგის სურვილს, გიორგი საგანელიძემ ხაზგასმით აღნიშნა:

„რა თქმა უნდა. ეს არის ორმხრივი მოძრაობა. ნებისმიერ ურთიერთობაში ყოველთვის ასეა - საჭიროა ურთიერთობების შემდგომი განვითარება, თუ ეს სურს ორ ან მეტ მხარეს (თუ ჩვენ ვსაუბრობთ მრავალმხრივ ურთიერთობებზე). როგორც ბელორუსის, ისე საქართველოს ხელმძღვანელობას აქვს ასეთი სურვლი. ვფიქრობ, რომ თუ ძალიან შევეცდებით, ყველაფერი გამოვა“, - თქვა გიორგი საგანელიძემ.

საგანელიძე 2023 წლიდან ბელორუსის რესპუბლიკაში საქართველოს საქმეთა დროებითი რწმუნებული იყო.