ნეთანიაჰუმ სინვარის მკვლელობას ღაზაში ომის დასასრულის დასაწყისი უწოდა

„იაჰია სინვარმა დაგეგმა და განახორციელა 7 ოქტომბრის ხოცვა-ჟლეტა, ეწეოდა თავისი სისხლიანი იდეოლოგიის პროპაგანდას ომის დაწყებამდე და შემდეგ, პასუხისმგებელი იყო ისრაელის მრავალი მოქალაქის მკვლელობასა და გატაცებაზე. ... ეს არის დიდი სამხედრო და მორალური მიღწევა ისრაელისთვის და მთელი თავისუფალი სამყაროს გამარჯვება რადიკალური ისლამის ბოროტ ღერძზე, რომელსაც ირანი ხელმძღვანელობს“, - განაცხადა კაცმა.

„ცაჰალის“ სპიკერმა დანიელ ჰაგარიმ თქვა, რომ სინვარი გაქცევის დროს მოკლეს. მან ჟურნალისტებს აჩვენა ვიდეო, სადაც ჩანს, რომ შენობის ნანგრევებში მყოფ სინვარს, რომელსაც ნიღაბი უკეთია, დრონი უახლოვდება. ვიდეო მთავრდება იმით, რომ ის დრონს სავარაუდოდ ჯოხს ესვრის. სინვართან ერთად მოკლული ორი პირი, როგორც ჩანს, მისი დაცვის წევრები იყვნენ.

„ჰამასის“ ლიდერის იდენტიფიცირება თითის ანაბეჭდებით მოხდა. ისრაელის ხელისუფლებას სინვარის დნმ-ის ნიმუშები აქვს, რადგან მან მრავალი წელი გაატარა ისრაელის ციხეებში.

სინვარი „ჰამასის“ ლიდერად დასახელდა მას შემდეგ, რაც ივლისში თეირანში, დაჯგუფების პოლიტიკური ლიდერი ისმაილ ჰანიე მოკლეს. არსებული ინფორმაციით, სინვარი ღაზას ქვეშ, ბოლო ორი ათწლეულის განმავლობაში „ჰამასის“ მიერ აშენებულ გვირაბებში იმალებოდა.

„ჰამასის“ კიდევ ერთი ლიდერის მკვლელობის შემდეგ, ლიბანურმა აჯგუფება „ჰეზბოლამ“ განაცხადა, რომ ისრაელის წინააღმდეგ ომის „ახალ და ესკალაციის ფაზაზე“ გადადის, ისრაელის პრემიერ-მინისტრი ბენიამინ ნეთანიაჰუ კი ამბობს, რომ სინვარის სიკვდილი „ომის დასასრულის დასაწყისია“.

„იაჰია სინვარი მკვდარია. ის რაფაში მოკლეს ისრაელის თავდაცვის ძალების მამაცმა ჯარისკაცებმა. მიუხედავად იმისა, რომ ეს არ არის ღაზაში ომის დასასრული, ეს არის დასასრულის დასაწყისი“, - თქვა ნეთანიაჰუმ.

ისრაელის პრემიერ-მინისტრმა დასძინა, რომ „ჰამასი“ ღაზას ვეღარ მართავს. მისი თქმით, ხალხისთვის ეს არის შესაძლებლობა „თავი გაითავისუფლონ ტირანიისგან“.