უსაფრთხოების სამსახურმა პანკისის ხეობის სოფლებში - ომალოში, ბირკიანსა და ჯოყოლოში ჩატარებული სპეცოპერაციის შედეგად, საქართველოს სამი მოქალაქე დააკავა. მათ ბრალად ტერორისტულ ორგანიზაცია „ისლამურ სახელმწიფოში“ გაერთიანება და ტერორისტულ საქმიანობაში დახმარება ედებათ.
ახალი ამბები
მკითხველის რჩეული
- 1 ნარკოტიკების ზედოზირებას თბილისში კიდევ 3 ახალგაზრდა ემსხვერპლა
- 2 გორში პოლიციელების მიერ ნაცემი პირი წინააღმდეგობის გაწევის ბრალდებით დააკავეს
- 3 გიგა ავალიანის საქმე: დემეტრე ჩიქოვანს 9 წელი და 9 თვე, ანი ნასყიდაშვილს 5 წელი და 3 თვე მიესაჯა
- 4 პანკისში მალხაზ მაჩალიკაშვილის ავტომობილი დააზიანეს
- 5 პროკურატურამ გორში ნაცემი პაპუნა ლოცულაშვილისთვის ბრალის წარდგენაზე უარი თქვა
- 6 6 პოლიციელი დააკავეს გორში მოქალაქეებზე ძალადობის ბრალდებით
„ისინი პანკისის ხეობაში ტერორისტული ორგანიზაციის მხარდამჭერი ე.წ. ჯამაათის ჩამოყალიბებასა და ტერორისტულ საქმიანობაში სხვა პირების ჩართვას ცდილობდნენ. ამ მიზნით, სხვადასხვა ლოკაციაზე აწყობდნენ ფარულ, კონსპირაციულ შეხვედრებს და ეწეოდნენ ტერორისტული იდეოლოგიის პროპაგანდას“, - განაცხადა სუს-ის უფროსის პირველმა მოადგილემ, ლაშა მაღრაძემ.
მისივე თქმით, დაკავებულებისა და მათთან შემხებლობაში მყოფი სხვა პირების მიმართ ფარული საგამოძიებო მოქმედებები დიდი ხნის განმავლობაში მიმდინარეობდა.
სუს-ის ინფორმაციით, სპეცოპერაციისა და საგამოძიებო მოქმედებების შედეგად, ნივთმტკიცებად ამოღებულია: ცეცხლსასროლი იარაღი და საბრძოლო მასალა; ასაფეთქებელი ნივთიერებები; მობილური ტელეფონები, კომპიუტერული ტექნიკა და სხვა ელექტრონული მატარებლები; „ისლამური სახელმწიფოს“ დროშა, სიმბოლიკა და პირადი დოკუმენტები.
გამოძიება საქართველოს სისხლის სამართლის კოდექსის ორი მუხლით მიმდინარეობს: 328-ე მუხლი - უცხო ქვეყნის ტერორისტულ ორგანიზაციაში გაერთიანება ან ტერორისტულ საქმიანობაში დახმარება; 236-ე მუხლი - ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვა.
აღნიშნული დანაშაული 10-დან 17 წლამდე ვადით თავისუფლების აღკვეთას ითვალისწინებს.
უსაფრთხოების სამსახურის განცხადებით, საგამოძიებო მოქმედებები აქტიურად გრძელდება დანაშაულში ჩართული სხვა პირების გამოვლენისა და დაკავების მიზნით.
