თბილისის საქალაქო სასამართლოს მოსამართლე თორნიკე ქოჩქიანმა 8-დღიანი პატიმრობა შეუფარდა უწყვეტი პროევროპული აქციის მონაწილეს, ვანო სხირტლაძეს, რომელიც რუსთაველის გამზირზე ე.წ. ჭყვიტინა სათამაშოს გამო დააკავეს.
ახალი ამბები
მკითხველის რჩეული
- 1 დააკავეს „ქართული ოცნების“ მხარდამჭერი მანანა გიორგობიანი
- 2 ბერლინში მოკლული ზელიმხან ხანგოშვილის ძმას და ნათესავებს გერმანია დაატოვებინეს
- 3 1 ნოემბრიდან საჯარო მოხელეებისთვის შეთავსებით ანაზღაურებადი სამუშაო იზღუდება
- 4 პროკურატურამ ირაკლი ღარიბაშვილს ბრალი წარუდგინა
- 5 ე.წ. ვისკის საქმეზე შემოსავლების სამსახურის უფროსის ყოფილ მოადგილეს ბრალი წარუდგინეს
- 6 ყვარლის საკრებულოს თავმჯდომარე გივი ზაუტაშვილი და მერის მოადგილე ლევან გელაძე დააკავეს
„ქართული ოცნების“ შინაგან საქმეთა სამინისტრო ვანო სხირტლაძეს ადმინისტრაციულ სამართალდარღვევათა კოდექსის 173-ე მუხლის მეორე ნაწილით გათვალისწინებულ ქმედებას - პოლიციელის შეურაცხყოფას ედავებოდა.
„ეჭირა სათამაშო, რომელიც გამოსცემდა ხმას - ჭყვიტინებდა. იგი მიდიოდა პოლიციელებთან და გამოსცემდა ამ ხმებს. ამ ქმედების გამო თავი შეურაცხყოფილად ვიგრძენი. დაკავების მიზეზი გახდა ეს ირონიული ქმედება, რაც გამოიხატებოდა სათამაშოს სახესთან ჭყვიტინით“, - განაცხადა სასამართლო პროცესზე მოწმედ მისულმა ერთ-ერთმა პოლიციელმა.
ტელეკომპანია „პირველის“ ცნობით, ვანო სხირტლაძის კითხვას, რასთან ასოცირდება მისთვის მამლის ჭყვიტინი, მოწმე პოლიციელმა უპასუხა: „სოციალურ ქსელში არის ვიდეოები, სადაც ეს ხმა დაცინვის მიზნითაა გამოყენებული. შეიძლება ბევრი რამე ჭყვიტინებს, მაგრამ აღნიშნული სათამაშო იყო დამამცირებელი“.
ვანო სხირტლაძე 20 ნოემბერს, რუსთაველის გამზირზე, რამდენიმე ადამიანთან ერთად დააკავეს. დაკავებულთა შორის იყო მიხეილ ზაქარეიშვილიც, რომელსაც შსს „პოლიციის კანონიერი მოთხოვნისადმი“ დაუმორჩილებლობას ედავებოდა. მოსამართლე თორნიკე ქოჩქიანმა მიხეილ ზაქარეიშვილიც სამართალდამრღვევად ცნო და 7-დღიანი პატიმრობა შეუფარდა.
