პროევროპული აქციების მეცხრე ღამეს პოლიციამ 48 ადამიანი დააკავა

შსს-ს განცხადების მიხედვით, პარლამენტთან, საპროტესტო აქციაზე მყოფ პირთა ნაწილის ქმედებებმა მიიღო ძალადობრივი ხასიათი - „პარლამენტის შენობის და მის წინა პერიმეტრზე მდგომი სამართალდამცველების მისამართით ისროლეს პიროტექნიკა“, რის შედეგადაც, შსს-ს მტკიცებით, მათი ერთი თანამშრომელი დაშავდა.

„ასევე, პოლიციის თანამშრომლებს აყენებდნენ სიტყვიერ შეურაცხყოფას, მათი მიმართულებით ისროდნენ ქვებსა და სხვადასხვა მძიმე საგნებს. აქციის მონაწილეები, სამართალდამცველების არაერთი მოწოდების მიუხედავად, რომ პროტესტი გამოეხატათ მშვიდობიანი ფორმით, კვლავ განაგრძობდნენ კანონსაწინააღმდეგო ქმედებებს, რა დროსაც შინაგან საქმეთა სამინისტრომ გაატარა კანონით მინიჭებული ზომები, მათ შორის გამოიყენა კანონით დაშვებული სპეციალური საშუალებები“, - ნათქვამია შსს-ს განცხადებაში.

საპოლიციო ძალებმა რუსთაველის გამზირზე მიმდინარე აქციის დაშლა დაახლოებით 00:30 საათზე დაიწყეს. სახალხო დამცველის და „საქართველოს ახალგაზრდა იურისტთა ასოციაციის“ შეფასებით, ამის სამართლებრივი საფუძველი არ არსებობდა, რადგან აქცია მშვიდობიანი იყო. პარალელურად სპეცრაზმელები და პოლიციელები მოქალაქეებს აკავებდნენ. რუსთაველის გამზირის გარდა, სპეცრაზმი განლაგებული იყო რესპუბლიკის მოედანზეც, სადაც ასევე დააკავეს რამდენიმე ადამიანი.

რუსთაველის გამზირზე დარბევის შემდეგ, მომიტინგეები გმირთა მოედნისკენ წავიდნენ, რა დროსაც, მარჯვენა სანაპიროზე, მათ შეიარაღებული პირები, სავარაუდოდ, „ქართული ოცნების“ ე.წ. ტიტუშკები დაუპირისპირდნენ. შინაგან საქმეთა სამინისტრო აცხადებს, რომ აქციის მონაწილეებმა გზაზე მოძრაობა შეზღუდეს და „კონფლიქტში შევიდნენ ავტომობილის მგზავრებთან, რომლებიც ერთ-ერთი დასაცავი პირის პირად დაცვას წარმოადგენდნენ“.