რუსეთის პრეზიდენტმა ვლადიმერ პუტინმა ხელი მოაწერა კანონს ოკუპირებულ აფხაზეთთან გაფორმებული იმ შეთანხმების რატიფიკაციის თაობაზე, რომელიც 2026-2030 წლებში ე.წ. რესპუბლიკის სოციალურ-ეკონომიკური განვითარების სახელმწიფო პროგრამის ხელშეწყობას ითვალისწინებს.
ახალი ამბები
მკითხველის რჩეული
- 1 რა მოხდა თელავის სასტუმროში, სადაც რუსეთის მოქალაქის ცემის ბრალდებით მამაკაცი დააკავეს
- 2 საპატრულო პოლიციამ შშმ პირს მანქანაში ჩააფსმევინა, შსს-ს 10 ათასის გადახდა დაეკისრა
- 3 283 ქოთანი და 7 კგ გამომშრალი მარიხუანა - დიზაინერ რატი რატიანს 15 წელი მიუსაჯეს
- 4 გაუპატიურება, წამება და დაკარგული ჩვილი - ნატა ვიბლიანის საქმეზე გამოძიება დაიწყო
- 5 სოხუმი მასშტაბური ენერგოკოლაფსის მიზეზად ენგურჰესზე მომხდარ ავარიას ასახელებს
- 6 მძღოლს, რომელმაც გორში ავარიით დედა-შვილი იმსხვერპლა, 225 ვიდეოჯარიმა ჰქონდა
შეთანხმების მთავარ მიზნად რუსეთსა და აფხაზეთს შორის სოციალურ-ეკონომიკური თანამშრომლობის შემდგომი განვითარება, მოსახლეობის ცხოვრების დონის ამაღლება და რეგიონში ეკონომიკური და საინვესტიციო აქტივობის სტიმულირება სახელდება.
რუსეთის მიერ გამოყოფილი ფინანსური დახმარება სხვადასხვა სფეროზე გადანაწილდება, მათ შორის - განათლებაზე, ახალგაზრდულ პოლიტიკაზე, ბავშვებისა და ახალგაზრდების აღზრდაზე და კულტურულ გაცვლაზე. დაფინანსების ერთ-ერთი პრიორიტეტია ტურიზმის სექტორი და ამ დარგისთვის აუცილებელი ინფრასტრუქტურის განვითარება. გარდა ამისა, სახსრები მიიმართება აფხაზეთის ე.წ. საგანგებო სიტუაციების სამინისტროს, პროკურატურისა და სახელმწიფო დაცვის სამსახურის თანამშრომელთა ფულადი სარგოსა და სოციალური გარანტიების გასაზრდელად.
რატიფიცირებული შეთანხმების თანახმად, აფხაზეთის დე ფაქტო ხელისუფლებას დაეკისრა ვალდებულება, რომ ადგილობრივი ორგანოების მეშვეობით მედიკამენტებით უზრუნველყოს აფხაზეთში მუდმივად მცხოვრები რუსეთის მოქალაქეები.
შეთანხმება მოსკოვში 2025 წლის 27 დეკემბერს გაფორმდა. მას ხელი მოაწერეს დე ფაქტო აფხაზეთის ეკონომიკის მინისტრმა თეიმურაზ მიკვაბიამ და რუსეთის ეკონომიკური განვითარების მინისტრის მოადგილემ სერგეი ნაზაროვმა. დე ფაქტო პარლამენტმა დოკუმენტის რატიფიცირება აპრილში მოახდინა, ხოლო რუსეთის სახელმწიფო დუმამ ივლისში.
საერთაშორისო და საქართველოს ეროვნული სამართლის მიხედვით, მსგავს დოკუმენტებს არავითარი ლეგიტიმური იურიდიული ძალა არ გააჩნიათ.
