ახალი ამბები

რუსული კანონის წინააღმდეგ პროტესტის მონაწილეები ამბობენ, რომ იმ დროს, როდესაც სპეცრაზმმა დარბევა დაიწყო, აქციაზე სიმშვიდე იყო და სპეციალური საშუალებების გამოყენების საჭიროება არ არსებობდა.

„წიწაკის სპრეის გამოყენება ისეთ მოწმენდილ ცაზე მოხდა, შოკში ვარ. რასთან დაკავშირებით დაიწყეს ეს მოქმედებები, გასაოცარია. ნამდვილად არაფერი ხდებოდა. ერთი ციცქნა პროვოკაციული ქცევა არ ყოფილა არავის მხრიდან. თვითონ დაიწყეს ტერიტორიის წმენდა, ალბათ, იმიტომ, რომ მშვიდობით გაატარონ მონები“, - განაცხადა ექიმმა ლალი ჯანაშიამ.

პარლამენტის უკანა შესასვლელთან სამოქალაქო აქტივისტები და ოპოზიციოური პარტიების წარმომადგენლებიც იმყოფებიან. აქციაზე დააკავეს „ლელოს“ ერთ-ერთი ლიდერი ირაკლი კუპრაძე. ის ამბობს, რომ სცემეს.

აქციის მონაწილეები დაშლას არ აპირებენ და პერიოდულად სკანდირებენ „რუსებო!“.

შინაგან საქმეთა სამინისტრო პარლამენტთან შეკრებილ აქციის მონაწილეებს მოუწოდებს, დაემორჩილონ სამართალდამცველების მითითებებს, თავი შეიკავონ „ძალადობრივი ქმედებებისგან და პოლიციელებზე თავდასხმებისგან“. როგორც უწყებაში აცხადებენ, აქციის მიმდინარეობისას დაშავებულია მათი ერთი თანამშრომელი.

„იმ შემთხვევაში თუ აქციის მონაწილეები გააგრძელებენ მართლსაწინააღმდეგო ქმედებებს, შინაგან საქმეთა სამინისტრო გამოიყენებს კანონით გათვალისწინებულ სპეციალურ საშუალებებს. კიდევ ერთხელ აღვნიშნავთ, რომ კანონდარღვევის თითოეულ ფაქტს, პოლიციის მხრიდან მოყვება შესაბამისი სამართლებრივი რეაგირება“, - ნათქვამია განცხადებაში.

პარლამენტთან მობილიზებულიები არიან დიდი რაოდენობით პოლიციელები. გარდა ამისა, განლაგებულია სპეცრაზმი და წყლის ჭავლის მანქანაც დგას.