სუს-ის შენობასთან, მანქანაში, ანტიკორუფციული სააგენტოს თანამშრომლის ცხედარი იპოვეს

თბილისში, ვაჟა-ფშაველას გამზირზე მდებარე სუს-ის შენობასთან საგამოძიებო მოქმედებები დილიდან მიმდინარეობდა. მოგვიანებით სამთავრობო მედიამ უწყების კომენტარი გაავრცელა, სადაც ნათქვამია, რომ გარდაცვლილს ჯანმრთელობის „გარკვეული პრობლემები“ ჰქონდა.

„ეს ადამიანი იყო ანტიკორუფციული სააგენტოს ძალიან გამოცდილი და ღირსეული თანამშრომელი, რომელიც ყველას ძალიან უყვარდა.

პირველადი, რაც შეგვიძლია გითხრათ, არის ის რომ, რამდენიმე თვის წინ საზღვარგარეთ გაიკეთა ბარიატრიული ოპერაცია, დაიკლო ათეულობით კილოგრამი, ამის გამო ჰქონდა ჯანმრთელობის გარკვეული პრობლემებიც.

რაც იკვეთება ახლა და ვიცით თანამშრომლებისგან – ის ადრე მოვიდა დილით სამსახურში, როგორც ჩანს, აიღო იარაღი, გავიდა სამსახურის ტერიტორიიდან და თავის ავტომანქანაში იპოვეს გარდაცვლილი ცეცხლსასროლი იარაღით მიყენებული ჭრილობით, ავტომანქანის გვერდით სავარძელზე დატოვა წერილი.

ეს არის მხოლოდ პირველადი მონაცემები, რაც ჩვენთვის ცნობილია. სხვა დეტალებს გამოძიება დაადგენს“, – ტელეკომპანია „რუსთავი 2“ სუს-ში გაკეთებულ კომენტარს ციტირებს.

პროკურატურის განცხადებით, შემთხვევის ადგილის დათვალიერებისას ამოღებულია ცეცხლსასროლი იარაღი, რომელიც გარდაცვლილს თან ჰქონდა და წერილი, რომელიც გვერდითა სავარძელზე იქნა ნანახი.

განახლება:

სახელმწიფო უსაფრთხოების სამსახურმა 4:43 საათზე Facebook-ზე გამოაქვეყნა განცხადება, სადაც ნათქვამია, რომ გარდაცვლილი ანტიკორუფციული სააგენტოს უფროსი ინსპექტორი სიმონ წაქაძეა. ის სუს-ში 2015 წლიდან მუშაობდა და „იყო ღირსეული, გამოცდილი თანამშრომელი, რომელიც გამოირჩეოდა საქმისადმი ერთგულებითა და მაღალი პროფესიონალიზმით“.

ამ თემაზე:

ჩაქვში სუს-ის თანამშრომელი გარდაცვლილი იპოვეს