სუს-მა დაადასტურა, რომ მამუკა მდინარაძე აშშ-ში იმყოფებოდა

„სახელმწიფო უსაფრთხოების სამსახურის უფროსი 7-10 თებერვალს, თავისი კოლეგების მიწვევით, სამუშაო ვიზიტით ამერიკის შეერთებულ შტატებში იმყოფებოდა. შეხვედრა უსაფრთხოების საკითხებთან დაკავშირებით გაიმართა“, – ნათქვამია სუს-ის მიერ გავრცელებულ მოკლე განცხადებაში.

აშშ-ში მამუკა მდინარაძის ვიზიტის შესახებ ინფორმაცია რამდენიმე დღის წინ ყოფილი პრემიერ-მინისტრის, გიორგი გახარიას პარტიის – „საქართველოსთვის“ წევრმა, გიორგი შარაშიძემ გაავრცელა. შარაშიძის თქმით, მდინარაძე „ქართული ოცნების“ ლიდერს, ბიძინა ივანიშვილს „შიკრიკად“ ჰყავდა გაგზავნილი.

სუს-ის დღევანდელი განცხადების შემდეგ, ოპოზიციური პარტია ითხოვს, განმარტებას, ვის შეხვდა მდინარაძე.

„რამდენიმე დღის წინ ჩვენ საზოგადოებას საჯაროდ ვაცნობეთ, რომ ივანიშვილის მიერ სუს-ის ხელმძღვანელი წარგზავნილი იყო შეერთებულ შტატებში შიკრიკად, რაც მაშინ მყისიერად უარყო სუს-ის წარმომადგენლობამ. ფაქტობრივად, დღეს მათ მოუწიათ თავიანთი ინფორმაციის უარყოფა და დაადასტურეს, რომ მამუკა მდინარაძე იმყოფებოდა შეერთებულ შტატებში. შესაბამისად, კეთილი ინებონ და საზოგადოებას აუხსნან, თუ რა მიზნებისთვის იმყოფებოდა და ვისთან ჰქონდა შეხვედრები სუს-ის ხელმძღვანელს“, – განაცხადა „საქართველოსთვის“ წევრმა, გიგა ფარულავამ.

ამ საკითხზე კომენტარი „ქართული ოცნების“ თავმჯდომარემ, შალვა პაპუაშვილმა გააკეთა. შეკითხვაზე, აშშ-ში მდინარაძის ვიზიტისას ხომ არ განიხილებოდა ბიძინა ივანიშვილისთვის სანქციების მოხსნის საკითხი, მან თქვა, რომ „სუს-ის განცხადებაში მოცემულია ვიზიტის მიზანი, საფუძველი და შინაარსი“.